Телефони «Боварӣ»-и ВКД сазовори боварист

Душанбе, 5 феврал. (АМИТ «Ховар»).- Соли дуввум аст, ки телефони боварии вазири корҳои дохилӣ бо рақамҳои 221-21-21 амал мекунад, ки он дар байни аҳолӣ сазовори эътимод гардидааст.  Тавре ки ба АМИТ «Ховар» аз маркази матбуоти ВКД хабар доданд, дар моҳи аввали соли равон беш аз 46 арзу шикоят ва дархости мардум ворид гардида, мавриди баррасӣ қарор дода шуд. Аз ҷумла, шаҳрванд Баҳодур Қурбонхолов, сокини кӯчаи Шерозии шаҳри Душанбе муроҷиат намуд, ки ӯро шахси номаълум мавриди латукӯб қарор дода, ба ӯ зарари вазнини ҷисмонӣ расонидааст.Ин ҷиноят аз тарафи кормандони фаврии ШВКД дар ноҳияи Фирдавсии пойтахт сари вақт ошкор гардида, барои содир намудани ҷинояти мазкур шаҳрванд Юнусов Тоҳир Салимович, соли таваллудаш 1988, сокини кӯчаи Шерозӣ 20/5 дастгир ва нисбат ба ӯ парвандаи ҷиноятӣ оғоз шудааст.Ҳамчунин шаҳрванд Парвиз Шарифов арзи нисбат ба муносибати дағалонаи сардори бахши Бозрасии давлатии автомобилии ШВКД дар ноҳияи Восеи вилояти Хатлон, майори милитсия Баҳодур Ҷононов ворид гардид, ки он низ сари вақт мавриди санҷиш қарор дода шуд. Муайян гардид, ки дар ҳақиқат майори милитсия Баҳодур Ҷононов муносибати ғайринизомӣ намуда, шаҳрванд Парвиз Шарифовро дар асоси қисми 1 моддаи 325 Кодекси ҳуқуқвайронкунии маъмурии Ҷумҳурии Тоҷикистон ба андозаи ду нишондод ҷарима намудааст.Аз ин рӯ майори милитсия Баҳодур Ҷононов барои дар сатҳи зарурӣ иҷро накардани вазифаи хизматӣ ва муносибати ғайриоинномавӣ ба ҷазои интизомӣ ҷалб карда шуд.Хотиррасон менамоем, ки телефони боварӣ ба таври шабонарӯзӣ фаъолият намуда, ҳар нафар метавонад бевосита бо он занг зада, бе сарфи маблағ аз шабакаҳои телефонӣ, ройгон оид ба ҳама гуна қонуншиканӣ, ҷиноятҳои вазнин, аз қабили таҳрибкорӣ, ҷиноятҳои дорои хусусияти коррупсионӣ ва ё террористӣ, одамкушӣ, одамрабоӣ ва инчунин қонуншиканӣ аз ҷониби худи кормандони милитсия арзу шикояти худро пешниҳод намояд.