Вайронкунандагони қонун мансабдорон ва соҳибкорони инфиродиянд

Кӯлоб, 5 феврал. (АМИТ «Ховар», С.Холов). – Кормандони нозироти андози шаҳри Кӯлоб дар давоми соли 2012 – ум 48 андозсупорандаи ҳуқуқию воқеиро санҷида, дар натиҷа 46 вайронкунандаи қонуни андозро ба маблағи 134 ҳазору 948 сомонӣ ҷарима карданд. Бинобар иттилои сардори нозироти андози шаҳр Фарҳод Қурбонов аксари вайронкунандагони қонуни мазкур шахсони максабдор ва соҳибкорони инфиродӣ буда, нисбат ба онҳо ҷаримаи маъмурӣ тартиб дода шудааст, ки маблағи умумии он 103 ҳазору 059 сомониро дар бар мегирад. Аз тарафи нозироти андоз ба 210 андозсупоранда ба маблағи 6 миллиону 393 ҳазору 500 сомонӣ огоҳинома ирсол шуда, 2 миллиону 180 ҳазору 900 сомонии он ба буҷаи шаҳр ворид гардид. Инчунин аз ҳисоби маҷбуран ситонидани бақияпулиҳои андоз то ин давра 1 миллиону 458 ҳазору 800 сомонӣ ба буҷа ворид гардидааст, ки ин шумора нисбат ба ҳамин давраи соли гузашта зиёдтар аст.