Ҳамоиши рӯнамоии китоби «Пайрав Сулаймонӣ»

Душанбе, 11 март. (АМИТ «Ховар», Раъно Нусратуллоева). Пагоҳ, 12 март дар Китобхонаи миллии Тоҷикистон маросими расмии рӯнамоии китоби донишманди маъруф, узви вобастаи Академияи илмҳои Ҷумҳурии Тоҷикистон устод Соҳиб Табаров «Пайрав Сулаймонӣ» баргузор мегардад.Лозим ба ёдоварист, ки чорабинии мазкур бо ибтикори Пажуҳишгоҳи забон, адабиёт, шарқшиносӣ ва мероси хаттии ба номи Рӯдакии Академияи илмҳои Ҷумҳурии Тоҷикистон ва Китобхонаи миллии Тоҷикистон доир мегардад. Дар ҳамоиш иштироки олимони варзида Акбар Турсон, Мӯсо Диноршоев, Худойназар Асозода ва муҳаққиқон аз Академияи илмҳои ҷумҳурӣ, Донишгоҳи миллии Тоҷикистон ва адибони шинохтаи кишвар дар назар аст.Боиси тазаккур аст, ки узви вобастаи Академияи илмҳои Ҷумҳурии Тоҷикистон, мунаққид ва адабиётшиноси маъруфи тоҷик Соҳиб Табаров тамоми умри бобаракати худро ба пажуҳиши адабиёти тоҷики охири асри Х1Х ва ибтидои қарни ХХ бахшида, як силсила таҳқиқоти муҳиму бунёдиро ба нашр расонид. «Мунзим», «Зиндагиномаи Садриддин Айнӣ», «Ҷаҳони андешаҳои Абдурауфи Фитрат» ва «Пайрав Сулаймонӣ» (таҳрири нав) аз ҷумлаи онҳост.Дар ин бора ба хабарнигори АМИТ «Ховар» котиби матбуотии Китобхонаи миллӣ Фотима Яқубова хабар дод.