«Парасту» ҳунармандонро ба сабқат мехонад

Душанбе, 28 март. (АМИТ «Ховар», Баҳманёр Муродов).-Ҷашнвораи ҷумҳуриявии театрҳои касбии кишвар—«Парасту» 5-уми апрел дар шаҳри Душанбе, дар толори театри академӣ-драмавии ба номи Абулқосим Лоҳутӣ ифтитоҳ меёбад. Бино ба иттилои Вазорати фарҳанги Ҷумҳурии Тоҷикистон ҷашнвора то 17-уми апрел давом ёфта, дар он 16 театри касбӣ аз шаҳру навоҳии кишвар иштирок хоҳанд кард. Дар ҷашнвораи «Парасту» спектаклҳое ба намоиш гузошта мешаванд, ки аз ҷониби драматургони тоҷик дар замони истиқлол офарида шудаанд. Беҳтаринҳои ҷашнвораро комиссияи босалоҳияте интихоб карда ва онҳо бо ҷоизаву туҳфаҳои арзишманд қадрдонӣ мешаванд. Ҳамчунин бояд зикр кард, ки ҷашнвора дар ду сол як маротиба баргузор гардида, дар «Парасту»-и гузашта ҷоизаи аввалро театри Лоҳутӣ барои намоиши “Рӯдакӣ”-и Ҳошим Гадо ва театри ба номи Маяковский барои намоишномаи “Ишқи Парӣ”-и коргардон Баҳодур Миралибеков соҳиб шуданд