Раиси шаҳр ба мақомоти ҳифзи ҳуқуқ дастури қатъӣ дод

Душанбе, 29 март.(АМИТ “Ховар”, Марзия Саидова).- Раиси шаҳри Душанбе Маҳмадсаид Убайдуллоев дар иртибот ба гум шудани ду нафар духтарчаи ноболиғ- Аралова Сабина Улуғбековнаи 5-сола ва Аралова Малика Темуровнаи 6-сола изҳори таассуф ва нигаронӣ намуда, ба мақомоти ҳифзи ҳуқуқи шаҳр дастури қатъӣ дод, то корҳои ҷустуҷӯиро дар мавриди дарёфти онҳо пурзӯр намоянд. Ин дастури раиси шаҳр ба кормандони мақомоти ҳифзи ҳуқуқи пойтахт дар ҷараёни иҷлосияи сенздаҳуми Маҷлиси вакилони халқи шаҳри Душанбе дода шуд, мегӯяд Шавкат Саидов –котиби матбуотии раиси шаҳри Душанбе. Дар иҷлосия шаҳрӣ ҳамзамон соири масъалаҳои марбут ба рушди соҳаҳои мухталифи пойтахт баррасӣ гардиданд.