Ҷилавгирӣ аз кирдорҳои нангин дар байни мактаббачагон

Душанбе, 24 апрел.(АМИТ «Ховар», Марзия Саидова).-Дар Муассисаи давлатии «Маркази кӯдакон ва наврасон»-и пойтахт ҷиҳати тақвияти ҳамкориҳои кумитаҳои падару модарон, мақомоти марбутаи ҳифзи ҳуқуқ ва мудирияти кулли мактабҳои таҳсилоти умумии пойтахт ҷаласаи васеи масъулин доир гардид. Дар ин бора Шавкат Саидов-котиби матбуотии раиси шаҳри Душанбе ба АМИТ «Ховар» иттилоъ дод.  Ҷаласаи мазкур бо хулоса аз оқибатҳои фалокатбори ҳодисаи нангини дар мактаби таҳсилоти умумии №37-и ноҳияи Сино рухдода дар асоси дастури раиси шаҳри Душанбе Маҳмадсаид Убайдуллоев ҳамчун амали вокунишӣ нисбат ба пешгирии чунин кирдорҳои фоҷеаовари ноболиғон бо истифода аз қувваи аҳли ҷамоатчигӣ сурат гирифт. Ҷаласаро муовини раиси шаҳри Душанбе Санавбар Раҳимова сарварӣ намуда, дар он прокурори шаҳр Саймурод Қодиров ва муовини аввали сардори Раёсати Вазорати корҳои дохилӣ дар шаҳри Душанбе Саидхӯҷа Мирзохӯҷаев оид ба вазъи ҷинояткорӣ миёни ноболиғон, пайомадҳои татбиқи талаботи қонунгузорӣ нисбат ба онҳо ва волидайн гузориши муфассал доданд.