700 ҳазор барои соҳилмустаҳкамкунӣ

Кӯлоб, 23 апрел. (АМИТ «Ховар», С.Холов). – Масъулини Корхонаи воҳиди давлатии зудамали механиконидашудаи минтақаи Кӯлоб корҳои соҳилмустаҳкамкуниро дар якҷоягӣ бо хоҷагии об дар ҷамоати деҳоти Зиракӣ ва дар мавзеи комбинати хонасозии шаҳри Кӯлоб дар масофаи 360 метр ба итмом расонида, бо масолеҳи оҳану бетонии ҳаҷмаш яккуба мустаҳкам намуданд. Масолеҳи оҳану бетонии яккуба дар корхона истеҳсол гардида, дар ҳолатҳои фавқулодда истифода мешавад.Мавриди зикр аст, ки дар айни ҳол корҳои соҳилмустаҳкамкунӣ дар мавзеи Лангар ва сойи Тебалайи ноҳияи Муъминобод ҷараён дошта, то ин муддат кормандон дар масофаи 500 метр корҳои соҳилмустаҳкамкуниро анҷом дода, 90 000 м (кв) симтӯр насб намуданд. Бо дастгирии Вазорати мелиоратсия ва захираҳои оби ҶТ ва бо маблағгузории Дирексия оид ба сохтмони иншооти ҳукуматии дастгоҳи иҷроияи Президенти ҶТ 700 000 сомонӣ барои корҳои соҳилмустаҳкамкунӣ ҷудо гардида, инчунин 22 адад техникаи гуногунро ба ин самт равона сохтаанд.