Беҳтаринҳои Душанбе: “Hyatt Regency», «Қанд» ва “Тайга”

Душанбе, 22 апрел.(АМИТ “Ховар”, Марзия Саидова).- “Hyatt Regency» зимни ҷамъбасти озмуни “Беҳтарин тарабхона, меҳмонхона ва ошхона” унвони беҳтарин меҳмонхонаи Душанберо соҳиб гардид. Дар озмун ҳамзамон беҳтарин тарабхонаи пойтахт — тарабхонаи «Қанд», “Тайга” бошад ошхонаи беҳтарини пойтахт гардид. Ғолибони озмун бо Ифтихорномаи мақомоти иҷроияи маҳаллии ҳокимияти давлатӣ дар шаҳри Душанбе дар Рӯзи пойтахт, ки ҳамасола шанбеи сеюми моҳи апрел таҷлил мегардад, сарфароз гардиданд. Ҳадафи асосии гузаронидани озмуни “Беҳтарин тарабхона, меҳмонхона ва ошхона” дар пойтахт- муаррифии сатҳи хизматрасонӣ ба шаҳрвандон ва меҳмонони пойтахт дар меҳмонхонаҳо, тарабхона ва ошхонаҳо, инчунин рушди соҳибкории хурду миёна ва дар ин замина ҷалби сармояи хориҷӣ ба иқтисодиёти пойтахт мебошад. Дар Рӯзи пойтахт дар баробари баргузории чорабиниҳои фарҳангию варзишӣ, инчунин як силсила озмунҳое, ки аз ҷониби шаҳрдории Душанбе қаблан эълон гардида буданд, ҷамъбаст шуда, ғолибони онҳо бо Ифтихорномаю туҳфаҳо сарфароз гардонида шуданд.