Боз ҳашт локомотиви Қазоқистон дар роҳҳои оҳани Тоҷикистон амал хоҳанд кард

Душанбе, 18 апрел. (АМИТ «Ховар», Афшини Муқим).- Дар мулоқоти Президенти Ҷумҳурии Тоҷикистон Эмомалӣ Раҳмон ва Президенти Ҷамъияти саҳҳомии Ширкати миллии Роҳи оҳани Қазоқистон Аскар Мамин масоили дурнамо ва ҳамкориҳои кунунии дуҷониба дар бахши нақлиёти роҳи оҳан, тақвияти ҳамкориҳо дар бахши ҳамлу нақли транзитӣ ба воситаи Қазоқистон ва истифодаи локомотивҳои Қазоқистон дар роҳҳои оҳани Тоҷикистон баррасӣ гардид. Аскар Мамин иттилоъ дод, ки дар айни ҳол чор локомотиви ҷониби Қазоқистон дар роҳҳои оҳани Тоҷикистон фаъолият дорад ва дар нақша аст, ки бо имзои як шартнома дар оянда боз ҳашт локомотиви дигар низ дар роҳҳои оҳани кишвар ба истифода дода шавад. Зикр шуд, ки маблағи умумии ин лоиҳа беш аз 54 миллиону 800 ҳазор долларро ташкил медиҳад.  «Мо дар нақша дорем, ки ба ҳамкории худ бо сохторҳои марбутаи ҷониби Тоҷикистон ҳар чӣ бештар тақвият бахшем»,- иброз намуд дар охири суҳбати худ бо хабарнигорон Аскар Мамин.