Фаъолияти 85 ҳазор мошин дар як шабонарӯз

Душанбе, 10 апрел. (АМИТ «Ховар», Лутфия Эшонқулова).- Дар давоми 4 соли охир дар самти таъмини бехатарии ҳаракат дар роҳҳо дар ҷумҳурӣ 112 иншооти чароғаки роҳнамои навъи диодӣ, аз ҷумла 55 чароғак дар шаҳри Душанбе мавриди истифода қарор дода шуданд.Ин нишондод зимни ҷаласаи Комиссияи ҳукуматии ҶТ оид ба таъмини бехатарии ҳаракат дар роҳҳо, ки имрӯз дар Душанбе доир гардид, зикр шуд.Дар ҷасалаи мазкур раиси комиссия, мудири шуъбаи мудофиа ва тартиботи ҳуқуқии дастгоҳи иҷроияи Президенти ҶТ Абдусаттор Раҷабов ҷараёни иҷрои барномаи мазкурро мавриди баррасӣ қарор дода, аъзои комиссия доир ба татбиқи бандҳои дахлдори барномаи мазкур ҳисобот доданд.А. Раҷабов изҳори нигаронӣ намуд, ки нобоваста аз оне, ки дар давоми 4 соли охир сатҳи садаманокӣ дар ҷумҳурӣ аз 6 то 12 % кам шудааст, ҳанӯз ин нишондод моро қонеъ карда наметавонад.«Хамасола дар Тоҷикистон зиёда аз 1400 садамаи нақлиётӣ ба қайд гирифта мешавад, ки бар асари он зиёда аз сад нафар ҳалок гардида, садҳо нафари дигар ҷароҳат мебардоранд. Рӯзе нест, ки садама рух надиҳад»,- гуфт раиси комиссия. Бинобар иттилои сардори Раёсати БДА ВКД ҶТ Маҳмадсаид Саидов дар давраи иҷрои барнома дар Тоҷикистон 4211 ҳодисаи роҳу нақлиётӣ ба қайд гирифта шудааст, ки дар натиҷа 1331 нафар ҳалок ва 4997 нафар маҷруҳ шудааст.Дар айни замон дар соҳаи нақлиёти ҷумҳурӣ 7 лоиҳа бо маблағи 1,1 миллиард доллари амрикоӣ татбиқ гардида истодааст.Зикр гардид, ки танҳо дар давоми 10 соли охир ба қаламрави ҷумҳурӣ 198 ҳазор мошини гуногунтамға ворид гардид. Омӯзиш нишон медиҳад, ки теъдоди мошинҳо дар пойтахти кишвар сол аз сол зиёд шуда, шиддатнокии ҳаракат дар кӯча ва ҳиёбонҳои мошингарди шаҳри Душанбе дар як шабонарӯз 80-85 ҳазор воситаи нақлиётро ташкил медиҳад.Дар доираи фаъолияти минбаъдаи Комиссияи ҳукуматӣ татбиқи чорабиниҳо вобаста ба беҳтар ба роҳ мондани бехатарии ҳаракат дар роҳҳо, такмили савияи дониши кормандони мақомоти давлатӣ ва пурзӯр намудани назорат аз болои фаъолияти мактабҳое, ки ронанда тайёр мекунанд, зарур шуморида шуд.