Филми мустанади «ТВ Центр» аз ҳаёти муҳоҷирон

Душанбе, 15 апрел. (АМИТ «Ховар», Музаффар Рустамов).– Ба иттилои сардори шуъбаи робита бо ҷомеаи Хадамоти муҳоҷирати назди Ҳукумати ҶТ Абдуллоҳи Қодирӣ аз 8 то 11-уми апрели соли ҷорӣ гуруҳи телевизионии «ТВ Центр»-и Русия оид ба омода намудани филми мустанад дар бораи «Муҳоҷирати меҳнатӣ» ба Тоҷикистон ташриф овард. Кормандони шуъбаи робита бо ҷомеа ва Раёсати ҳамкориҳои байналмилалӣ ба гуруҳи наворбардорони телевизионии «ТВ Центр»-и Русия ҳамроҳӣ намуда, оид ба фаъолият ва зиндагонии мардуми тоҷик, инчунин муҳоҷирони меҳнатие, ки ба Федератсияи Русия сафар менамоянд, маълумот доданд. Онҳо бо ҳаёт ва фаъолияти мардуми тоҷик, урфу одат ва расму оини он шиносоӣ пайдо намуданд. Ҳамчунин онҳо тарзи пур намудани корти муҳоҷират, гузаштан аз назди кормандони гумрук ва сарҳадчиён, ҷараёни сафари муҳоҷирони тоҷик ба Федератсияи Русияро дар фурудгоҳи байналмилалӣ ба навор гирифтанд. Сипас бо муовини аввали сардори Хадамоти муҳоҷират Анвар Бобоев мусоҳиба анҷом доданд.