Иштироки намояндагони Тоҷикистон дар ҳамоиши байналмилалӣ

Душанбе, 15 апрел.(АМИТ «Ховар», Марзия Саидова).- «Нақши созмонҳои парлумонӣ дар бунёди Аврупои бидуни хатҳои тафриқотӣ», таҳти чунин унвон дар Маркази парлумонии Санкт- Петербурги Русия конфронси парлумонии байналмилалӣ доир гардид, ки дар кори он ҳайати парлумонии Тоҷикистон таҳти роҳбарии раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев ширкат намуданд. Ҳамоиши мазкур бо ибтикороти Ассамблеяи Байнипарлумонии кишварҳои Иттиҳоди Давлатҳои Мустақил /ИДМ/ ва Ассамблеяи Парлумонии Шӯрои Аврупо баргузор гардид. Мамадшо Илолов-раиси Кумитаи палатаи болоии Парлумони ҷумҳурӣ дар мизи мудаввар, ки дар доираи ҳамоиш дар мавзӯи «Нақши парламентҳо дар ҳифзу таҳкими ҳуқуқи инсон» баргузор шуд, сухан гуфт. Мавсуф доир ба вазъи таъмини ҳуқуқу озодиҳои инсон дар кишвар ва нақши мақоми қонунгузорӣ дар рушди равандҳои демократӣ ва хамзистии осоиштаи таркиби иҷтимоии ҷомеаи тоҷикон ибрози андеша намуд.