Майдони варзишӣ дар Муъминобод

Кӯлоб, 9 апрел. (АМИТ «Ховар», С.Холов). – Дар ноҳияи Муъминобод сохтмони майдони варзишӣ барои 7400 нафар вусъат ёфта то ин муддат корҳои сохтмонӣ ва васлгарӣ дар бино 65 фоиз иҷро шудаанд. Як қисмати бино аз тарафи ҶДММ «Кӯлобдеҳотсоз», ки роҳбарии онро Қурбоналӣ Достиев ба уҳда дорад, ба истифода дода мешавад. Ба гуфти Достиев маблағгузории сохтмони бино аз тарафи фармоишгар- Дирексияи сохтмони иншооти назди ҳукумати ҶТ таъмин шуда, маблағҳои мавҷуда барои хариди масолеҳи сохтмонии бино, музди меҳнати сохтмончиён, хариди сӯзишворӣ дигар корҳои сохтмонӣ равона мегарданд. Дар айни ҳол дар корҳои сохтмонӣ беш аз 20 нафар сохтмончӣ фаъолият дошта, бо шароити лозимӣ таъмин мебошанд. Гуфта мешавад дар корҳои сохтмонии бинои варзишӣ се ҷамъияти дорои масъулияти маҳдуд фаъол буда, масъулини ҷамъиятҳо тасмим гирифтаанд, то 31 июли соли ҷорӣ корҳои сохтмониро бо сифати баланд ба анҷом расонанд.