Мусодираи беш аз 65 кг маводи мухаддир

Душанбе, 29 апрел. «АМИТ «Ховар», Бекназари Абӯбакр). — Дар ҷараёни 3 амалиёти фаврӣ-ҷустуҷўйӣ кормандони Кумитаи давлатии амнияти миллии Ҷумҳурии Тоҷикистон дар ҳудуди Вилояти Мухтори Қўҳистони Бадахшон ва вилояти Хатлон аз қочоқчиён зиёда аз 65 килограмм маводи мухаддирро мусодира намуданд. Дар ин бора ба АМИТ «Ховар» аз маркази робитаҳои ҷамъиятии КДАМ иттилоъ доданд.Ба иттилои манбаъ 19 апрели соли ҷорӣ дар ВМКБ бо гумони даст доштан дар муомилоти ғайриқонунии маводи мухаддир, дар ҳудуди деҳаи Барчиди ноҳияи Шуғнон Рамихудоев Улуғбек Шукрихудоевич, соли таваллудаш 1985, сокини шаҳри Хоруғ боздошт гардид. Номбурда тибқи маслиҳати пешакӣ аз шаҳрвандони ҶИА қариб 3 килограмм маводи мухаддири героин ва гашишро дастрас намуда, мехост онҳоро ба шаҳри Хоруғ интиқол диҳад. Дар маркази робитаҳои ҷамъиятии КДАМ иттилоъ доданд, ки сокини ноҳияи Шуғнон Мамадризоев Ҷасур Бахтиёрович дар бозори муштараки «Тем»-и шаҳри Хоруғ бо Фирўз ном сокини деҳаи Дишори улусволии Шуғнони вилояти Бадахшони Афғонистон созиши ҷиноятӣ анҷом дода, сипас дар минтақаи сарҳадии байни деҳаҳои Возм ва Ёмчи ноҳияи Шуғнон, аз ў бар ивази 10 адад зарфи пластикии дорои машруботи спиртӣ, 385 грамм гашишро қабул намудааст. Зимни амалиёт Мамадризоев Ҷасур дастгир карда шуда, аз ў ин миқдор маводи мухаддир дарёфт гардиданд.Кўшиши дигари интиқоли маводи мухаддир дар ҳаҷми махсусан калон аз ҳудуди ҶИА тавассути сарҳади давлатӣ, рўзи 22 апрел дар минтақаи наздимарзии ноҳияи Қумсангир барбод дода шуд. Дар ҷараёни амалиёт гурўҳи 5-нафараи қочоқчиён ба кормандони Кумитаи давлатии амнияти миллӣ муқобилияти мусаллаҳона нишон доданд. Дар натиҷаи задухўрд марзшиканон маҷбур шуданд борро партофта, ба самти Афғонистон паноҳ баранд. Ҳангоми азназаргузаронии ҷойи воқеа 61 килою 985 грамм маводи мухаддир, аз ҷумла 3 килограмму 40 грам героин, 58 килограму 295 грамм гашиш ва 65 грамм афюн дарёфт ва мусодира гардиданд.Айни замон аз рўйи ҳодисаҳои номбаршуда парвандаҳои ҷиноятӣ оғоз гардидаанд, тафтишоти пешакӣ давом дорад.Маврид ба ёдоварист, ки дар маҷмўъ, аз аввали соли равон кормандони Кумитаи давлатии амнияти миллӣ аз гардиши ғайриқонунӣ зиёда аз 950 килограмм маводи мухаддирро мусодира намудаанд.