Намоиши маҳсулоти нассоҷии Туркманистон

Душанбе, 11 апрел. (АМИТ «Ховар», Покиза Маҳмадбекова). – 10 апрел дар шаҳри Душанбе маросими ифтитоҳи намоишгоҳ — ярмаркаи маҳсулоти саноати нассоҷии Туркманистон баргузор гардид. Раиси Палатаи савдо ва саноати Тоҷикистон Шариф Саид намоишгоҳро ифтитоҳ намуда, зикр кард, ки ин чорабинӣ бо дастгирии Президенти Ҷумҳурии Тоҷикистон ва Ҳукумати кишвар ба муносибати 20 – солагии барқароршавии муносибатҳои дипломатии Тоҷикистону Туркманистон роҳандозӣ мешавад. Раиси Палатаи савдо ва саноати Туркманистон Мерган Шалиев матни табрикномаи Президенти Туркманистон Қурбонгулӣ Бердимуҳаммедовро қироат намуд. Дар табрикнома гуфта мешавад, ки Туркманистон бо Ҷумҳурии Тоҷикистон зич ҳамкорӣ намуда, муносибатҳои ҳамсоягии некро дар заминаи дастовардҳои таърихӣ ва фарҳангию маданӣ рушду густариш мебахшад. Муносибатҳои дӯстона, ки аз имтиҳони замон гузаштаанд, ҳамчунин умумияти фарҳангу арзишҳои маънавӣ таҳкурсии муҳими рушди самарабахши муносибатҳои байнидавлатӣ ба шумор мераванд.