«Насли созанда»-и Ҳизби Халқии Демократии Тоҷикистон

Душанбе, 02 апрел. (АМИТ «Ховар», Дилшодаи Хайруллоҳ).- Бо ибтикори дастгоҳи Кумитаи Иҷроияи Марказии Ҳизби Халқии Демократии Тоҷикистон ва Ташкилоти ҷамъиятии ҷавонон «Созандагони Ватан» ҷиҳати баланд бардоштани руҳияи ватандӯстӣ, худшиносӣ, бедории воқеии миллӣ, сатҳи зебоишиносӣ ва маънавиёту созандагию бунёдкории ҷавонон, ҳисси ифтихори миллӣ аз дастовардҳои давраи Истиқлолият, тарғиби арзишҳои фарҳанги миллӣ, фароҳам овардани имконияти васеи қонеъ гардонидани талаботи маънавӣ ва густурда сохтани нақши ҷавонон чун нерӯи созандаи ҷомеа аксияи «Насли созанда» роҳандозӣ мешавад.Аксия муддати 1 моҳ идома ёфта, бо баргузории чорабиниҳои мухталиф, намоишгоҳҳои ҳунарҳои бадеӣ ва ихтирооти ҷавонон, корҳои ободонӣ, чорабиниҳои калони оммавию фарҳангӣ бо иштироки ҳунармандони шинохтаи мамлакат, аҳли зиё тамоми манотиқи кишварро фаро хоҳад гирифт. Аксияи мазкур рӯзи 6 апрел аз маркази вилояти Хатлон оғоз гардида, 13 апрел дар вилояти Суғд, баъдан дар шаҳри Душанбе, Вилояти Мухтори Куҳистони Бадахшон ва минтақаи Рашт идома меёбад.