Парлумон Конвенсияи қолабии СУТ ба тасвиб расонд

Душанбе, 17 апрел.(АМИТ «Ховар», Марзия Саидова).-Палатаи поёнии парлумони Тоҷикистон имрӯз Конвенсияи қолабии Созмони умумиҷаҳонии тандурустӣ /СУТ/ оид ба мубориза бар зидди тамокуро тасдиқ намуд. Саида Ҷобирова-муовини аввали вазири тандурустии ҷумҳурӣ санади мазкурро дар назди вакилони парлумон шарҳ дода гуфт, ки ҳадафи он ҳимояи наслҳои ҳозира ва оянда аз оқибатҳои зараровар ба саломатии одамон, инчунин пешгирии оқибатҳои иҷтимоӣ, экологӣ ва иқтисодии истеъмоли тамоку ва мубориза бар зидди истеъмоли он аст. Саида Ҷобирова афзуд, ки Конвенсияи мазкурро алҳол 174 давлати ҷаҳон қабул намудааст.Ҳамкории байналмилалӣ, хусусан таҳвили технологияҳо, донишҳо ва расонидани кӯмаки молиявӣ, ироаи хизматрасонии экспертӣ барои ташкил ва амалӣ намудани барномаҳои самарабахши мубориза бар зидди тамоку, бо назардошти шароити фарҳангии маҳаллӣ ва омилҳои иҷтимоӣ, иқтисодӣ, сиёсӣ ва ҳуқуқӣ аз бахшҳои асосии Конвенсия маҳсуб меёбад. Зикр шуд, ки андешидани чораҳои ҳамаҷонибаи бисёрсоҳавӣ ва амалҳои ҷавобӣ оид ба кам намудани истеъмоли тамоми маҳсулоти тамоку, ки дар сатҳи миллӣ, минтақавӣ ва байналмилалӣ тибқи принсипҳои тандурустии ҷамъиятӣ барои пешгирии бемориҳои гуногун ва марги нобаҳангом, ки аз истеъмоли тамоку ба амал меоянд, зарур аст. Мавриди зикр аст, ки ду сол муқаддам палатаи поёнии парлумони Тоҷикистон лоиҳаи қонун дар бораи маҳдуд кардани сигоркаширо дар ҷойҳои ҷамъиятӣ баррасӣ ва қабул намуда буд. Тибқи он сигоркашӣ дар ҷойҳои ҷамъияти мамнeъ буда, шахсоне, ки қонунро риоя намекунанд, аз онҳо дар ҳаҷми беш аз 40 сомонӣ ҷарима ситонида мешавад.13.27.