Рӯзи умумиҷаҳонии тандурустӣ

Душанбе, 8 апрел. (АМИТ «Ховар», Ибодат Давлатова).-Ҳамасола бахшида ба 7-уми апрел – Рӯзи умумиҷаҳонии тандурустӣ дар ДДТТ чорабиниҳои гуногун баргузор мешаванд. Соли равон Ташкилоти умумиҷаҳонии тандурустӣ мавзӯи Рӯзи умумиҷаҳонии тандурустиро «Бемории фишорбаландӣ» интихоб намуд. Бахшида ба ин рӯз дар доираи мавзӯи мазкур дар донишгоҳ форум гузаронида шуд. Дар форум дар қатори устодону донишҷӯёни донишгоҳ инчунин намояндагони Ташкилоти умумиҷаҳонии тандурустӣ, Вазорати тандурустӣ иштирок намуданд. Дар форум 286 нафар, аз ҷумла мудирони кафедраҳо, аъзои раёсат, омӯзгорон, аспирантҳо, ординаторони клиникӣ, интернҳо ва донишҷӯёни курсҳои болоӣ ширкат варзиданд. Инчунин дар он аксия барои расонидани кӯмаки ройгони ташхисию табобатии устодони донишгоҳ ба аҳолии шаҳри Душанбе баргузор гардид. Бояд гуфт, ки ба зиёда аз 60 нафар ашхоси ниёзманд, ки аксарияти онҳо камбизоат буданд, кӯмаки машваратӣ ва ташхисию табобатӣ расонида шуд. Ба ниёзмандон ба ҷуз аз ёрии машваратӣ инчунин маводи доруворӣ расонида шуд.