Вохӯрии Қ. Қоимдодов бо В. Салко

Душанбе, 11 апрел (АМИТ «Ховар»).- Мулоқоти Сафири Ҷумҳурии Точикистон дар Ҷумҳурии Беларус Қозидавлат Қоимдодов бо вазири захираҳои табиӣ ва ҳифзи муҳити зисти Ҷумҳурии Беларус Владимир Григоревич Салко баргузор гардид. Мусоҳибон аз сатҳи муносибатҳои Тоҷикистону Беларус изҳори қаноатмандӣ намуда, рушди муназзами ҳамкориҳои дуҷонибаро дар самтҳои гуногун зикр карданд. Ҷонибҳо зикр карданд, ки дар Беларус мисли Тоҷикистон дар соҳаи ҳифзи муҳити зист ва захираҳои обӣ таҷрибаи хуб мавҷуд аст ва аз он истифода кардан мумкин аст. Дар ин қарина ҷонибҳо алоқамандии худро ҷиҳати ба имзо расонидани Созишнома дар бораи ҳамкорӣ дар соҳаи захираҳои табиӣ ва ҳифзи муҳити зист иброз намуданд. Ҷониби беларусӣ омодагии худро ҷиҳати иштирок дар Мулоқоти васеи минтақавӣ, ки онро Бунёди ҷаҳонии экологӣ (GEF) бо иштироки Озарбойҷон, Қазоқистон, Қирғизистон, Тоҷикистон, Туркманистон, Ӯзбекистон, Арманистон, Беларус ва Русия дар рӯзҳои 30 апрел-2 майи соли 2013 дар шаҳри Душанбе баргузор карданист, тасдик намуд. Дипломати тоҷик зикр намуд, ки Ҷумҳурии Тоҷикистон ташаббускорӣ аз ҷониби Созмони Милали Муттаҳид эълом доштани «Соли байналмилалии оби тоза», Даҳсолаи байналмилалии амал «Об барои ҳаёт, 2005-2015», инчунин гузаронидани «Соли байналмилалии ҳамкорӣ дар соҳаи об, 2013» мебошад. Ба ин мавзуъ таваҷҷуҳ намуда, ҷониби Беларус омодагии худро ҷиҳати иштирок дар кори Конфронси байналмилалии сатҳи баланд оид ба ҳамкорӣ дар соҳаи об, ки 20-21 августи соли 2013 дар Душанбе баргузор хоҳад шуд, иброз дошт.