Вохӯрии шоирон бо адибони ҷавон

Душанбе, 10 апрел. (АМИТ «Ховар», Раъно Нусратуллоева).- Дирӯз дар факултаи филологияи тоҷики Донишгоҳи давлатии омӯзгории Тоҷикистон ба номи С.Айнӣ бо иштироки ректори донишгоҳ, академик Абдуҷаббор Раҳмонов, шоири ширинкалом Парда Ҳабиб ва нависанда Равшани Ёрмуҳаммад маҳфили адибони ҷавон баргузор гардид. Меҳмонон аз фаъолияти корӣ ва эҷодӣ сухан гуфта, аз эҷодиёти хеш шеъру ғазалҳо қироат намуданд. Ҳамзамон донишҷӯёни эҷодкор-Хуршед Исанов, Парасту Бозиева, С.Бобоев ва М.Абдураҳмонов чакидаҳои қаламашонро баҳри ҳозирин пешкаш карданд. Адибон Парда Ҳабиб ва Равшани Ёрмуҳаммад ба ашъори ҷавонон баҳои сазовор дода, изҳор доштанд, ки аксари донишҷўён дар сабкҳои Лоиқ, Бедил, Ҳофиз, Б.Собир ва дигорон эҷод мекарданд.Дар ҷамъомад ректори донишгоҳ А.Раҳмонов пешниҳод намуд, ки маҳфили адибони ҷавон бо исми устод Лоиқ Шералӣ номгузорӣ гардад, зеро ин шоири зиндаёд маҳз дар ҳамин факултаи донишгоҳ таҳсил кардааст. Пешниҳоди мазкур аз ҷониби аҳли маҳфил бо хушнудӣ истиқбол гардид.