Ҷашни нимасраи кафедра

Душанбе, 17 май. (АМИТ «Ховар», Раъно Нусратуллоева).-Дирӯз бахшида ба 50-солагии таъсиси кафедраи фалсафаи Донишгоҳи давлатии омӯзгории Тоҷикистон ба номи С.Айнӣ дар бинои асосии таълимгоҳи мазкур конфронси ҷумҳуриявӣ зери унвони «Фалсафаи маориф: масъалагузорӣ, даъват ва дурнамо» баргузор гардид. Тавре ки Бахтиёри Абдураҳим, котиби матбуотии донишгоҳ иттилоъ дод, дар конфронс файласуфони маъруф аз макотиби олии мамлакат ширкат варзиданд.Ректори донишгоҳ Абдуҷаббор Раҳмонов пиромуни нақши кафедраи фалсафа дар тарбияи мутахассисони ин соҳа андешаронӣ намуд. Дар такя бар қавли мавсуф, аксар олимони соҳаи фалсафа, ки имрӯз шоистаи эътироф гардидаанд, дастпарварони маҳз ҳамин даргоҳ мебошанд. Дар айни замон низ устодони варзидаю соҳибунвони зиёде дар кафедра фаъолият мебаранд ва дар радифи таълими донишҷўён, ҳамзамон, ба тадқиқи мавзӯоти муҳиму сарбастаи илми фалсафа машғуланд. Дар конфронс ҳамчунин аз устодоне, ки дар таъсиси кафедраи мазкур саҳм гузоштаанд, ном бурда шуд ва ҳамзамон фаъолияти онҳое, ки дар тӯли ин муддат дар кафедра кор кардаанд, шоистаи таҳсин арзёбӣ гардид.