А.Ансип: «Дар оянда шоҳиди густариши муносибот хоҳем шуд»

Душанбе, 7 май.(АМИТ «Ховар», Марзия Саидова).- Тақвияти робитаҳои ҳасанаи Душанбею Таллин дар арсаҳои сиёсӣ, парлумонӣ, иқтисодӣ, тиҷоратӣ ва кишоварзӣ дар меҳвари мулоқоти Шукурҷон Зуҳуров — раиси Маҷлиси намояндагони Маҷлиси Олии ҷумҳурӣ ва Андрус Ансип- Сарвазири Эстония қарор дошт. Шукурҷон Зуҳуров доир ба фаъолияти палатаи поёнии Парлумони Тоҷикистон гуфт, ки аз ҷониби Парлумони Тоҷикистон қонуну санадҳои муҳим ва созишномаву қарордодҳо таҳия ва ба тасвиб расидаанд, ки ҷавобгӯи меъёрҳои байналмилалианд. Мавсуф зикр кард, ки мо ҳамеша алоқаманди тақвияти ҳамкориҳо байни Тоҷикистону Эстония мебошем. Зикр гардид, ки таъсиси гуруҳи дӯстӣ ва ҳамкорӣ байни парлумонҳои ҳар ду кишвар такони ҷиддие дар тавсеаи ду кишвари дӯст хоҳад гардид. Ҳар ду кишвар дар масъалаҳои муҳими байналмилалӣ ва минтақавӣ мавқеи муштарак дошта, ин раванд ба таҳкими сулҳу суботи комил дар миқёси ҷаҳон ва минтақа равона гардидааст. Раиси Парлумони Тоҷикистон аз раванди рӯ ба рушди муносиботи иқтисодиву тиҷоратии ҳар ду давлат изҳори қаноатмандӣ намуда, изҳор дошт, ки мақомоти марбутаи Душанбе ва Таллин бояд дар самти густариши муносиботи мутақобилан судманд талошҳои муассир анҷом диҳанд. Сарвазири Эстония ба тавсеаи муносиботи байнипарлумонии Парлумони кишвараш бо Парлумони Тоҷикистон дахл карда, гуфт, ки густариши ҳамкориҳои ду мақоми олии қонунбарор метавонад барои рушди равобити дигар соҳаҳо заминаи ҳуқуқӣ ва қонунӣ муҳайё созад. Андрус Ансип таъкид кард, ки дар ин замина мо алоқаманди таҳкими равобит дар бахшҳои саноат, кишоварзӣ, рушди туризм, тақвияти ҳамкориҳо дар соҳаи нақлиёт ва коммуникатсия ва ҷорӣ намудани таҷрибаи Эстония дар бахши технологияи иттилоотӣ дар Тоҷикистон ҳастем. Сарвазири Эстония афзуд, ки миёни ҳар ду кишвар имкониятҳои истифоданошудаи ҳамкорӣ ҳанӯз ҳам зиёданд ва мо ба марҳилаҳои ин равобит ворид гардида, дар оянда шоҳиди густариши муносиботи дуҷониба дар тамоми арсаҳо хоҳем гашт. Андрус Ансип аз Шукурҷон Зуҳуров даъват ба амал овард, ки дар замони барояш муносиб аз Эстония боздид намояд. Мусоҳибон зимни мулоқот ҳамзамон дигар масъалаҳои мавриди таваҷҷуҳи тарафайн, хусусан авзои Афғонистонро матраҳ намуданд. 13.40.