Баррасии масъалаи бозпас гардонидани лоиҳаи қонуни конститутсионӣ

Душанбе, 27 май.(АМИТ «Ховар», Марзия Саидова).-Масъалаи пас гардонидани лоиҳаи Қонуни конститутсионии Ҷумҳурии Тоҷикистон «Оид ба ворид намудани илова ба Қонуни конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон» имрӯз дар ҷаласаи Шӯрои палатаи поёнии Парлумони мамлакат баррасӣ гардид. Дар ҷаласа, ки таҳти раёсати Шукурҷон Зуҳуров –раиси МАҷлиси намояндагон баргузор гардид, аъзои Шӯро ҳамзамон масъалаи ворид намудани тағйиру иловаҳо ба як силсила қонунҳои амалкунандаи кишварро матраҳ намуданд. Аъзои Шӯро ворид намудани тағйиру иловаҳо ба лоиҳаи қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», лоиҳаи қонунҳои Ҷумҳурии Тоҷикистон «Дар бораи энергетика», «Дар бораи роҳҳои автомобилгард ва фаъолияти роҳдорӣ», «Дар бораи таъмини амнияти санитарию эпидемиологии аҳолӣ», «Дар бораи нотариати давлатӣ», «Дар бораи муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм»-ро муҳокима намуданд. Ҳамчунин дар Шӯрои Маҷлиси намояндагон роҷеъ ба аҳамияти ворид намудани тағйирот ба Кодекси ҷиноятии Ҷумҳурии Тоҷикистон ва Кодекси мурофиавии ҷиноятии Ҷумҳурии Тоҷикистон табодули назар карда шуд.