Бозор Собир мулоқоташ бо Эмомалӣ Раҳмонро бародарона хонд

Душанбе, 30 май. (АМИТ «Ховар», Афшини Муқим).- Имрӯз Президенти Ҷумҳурии Тоҷикистон Эмомалӣ Раҳмон шоири маъруфи тоҷик Бозор Собирро, ки дар пайи ҳаводиси маълуми ибтидои солҳои 90-уми асри гузашта ба Амрико ҳиҷрат карда буду бо даъвати Президент ба Ватан бар гашт, ба ҳузур пазируфт. Бозор Собир дар ҳузури намояндагони ВАО мулоқоташро бо Сарвари давлат дӯстона ва бародарона унвон карда, ба Президенти кишвар ҷиҳати даъват ва мусоидат арзи сипос намуд. Бозор Собир гуфт: «Дар мадди назари Ҳукумат қарор доштан барои ман кифоя аст».Ба иловаи Бозор Собир ин бори аввал нест, ки ӯ аз ҷониби Ҳукумати мамлакат ба Ватан даъват мешавад. «Ҳанӯз солҳое, ки Талбак Назаров вазири корҳои хориҷӣ буд, ман ба Тоҷикистон даъват шуда будам, аммо ҳанӯз замони муносиб набуд, аз ин рӯ, ин корро барои ягон рӯзи мувофиқтар мавқуф гузоштам. Чандин бори дигар низ даъват шуда будам, аммо ин бор аз тариқи сафири Тоҷикистон даъват шудам, ки бо ӯ бевосита дар хонаи худам суҳбат доштем ва ман ин даъватро хуш пазируфтам»,- иброз дошт Бозор Собир.