Хушнудии собиқ Президенти Конфедератсияи Швейтсария аз эълони мороторий ба ҳукми қатл дар Тоҷикистон

Душанбе, 15 май. (АМИТ «Ховар», Афшини Муқим).- Дар мулоқоти Президенти Ҷумҳурии Тоҷикистон Эмомалӣ Раҳмон ва узви Комиссияи байналмилалӣ бар зидди ҳукми қатл, собиқ Президенти Конфедератсияи Швейтсария хонум Рут ДРЕЙФУС, ки нимаи дуюми 15-уми май доир гардид, як қатор мавзуоти мавриди таваҷҷуҳи ҷонибҳо баррасӣ гардиданд. Рут ДРЕЙФУС пас аз мулоқот бо Сарвари давлат дар ҳузури намояндагони воситаҳои ахбори омма иброз намуд, ки «Мо ният дорем, то Осиёи Марказӣ ба минтақае, ки дар он ҳукми қатл пурра бекор карда шуддаст, мубаддал шавад. Бояд бигӯям, ки дар ин самт нақши Тоҷикистон басо чашмрас аст»Ба гуфти номбурда ҷониби Швейтсария аз бекор гардидани ҳукми қатл дар тамоми кишварҳои олам манфиатдор буда, барои расидан ба ин ҳадаф иқдомот ва мусоидати худро идома медиҳад.«Мо хуб медонем, ки дар ин самт бояд ҳар як кишвар мустақиман ҷодаи худро интихоб намояд ва барҳақ Тоҷикистон дар роҳи дуруст қарор дорад» — гуфт Рут ДРЕЙФУС.Собиқ Президенти Конфедератсияи Швейтсария аз он хушнудӣ намуд, ки аз соли 2004 ин ҷониб дар Тоҷикистон дар ин масъала мороторий эълон шудааст. Номбурда изҳори итминон кард, ки Тоҷикистон дар муддати кӯтоҳ метавонад ба ҳадафи ниҳоӣ дар ин самт – пурра аз байн бурдани ҳукми қатл дар кишвар бирасад. Ин дар ҳолест, ки ҷиҳати берун кардани ҳукми қатл аз қонунгузории Тоҷикистон дар кишвар аз гуруҳи корӣ амал мекунад ва дар ин бобат Эмомалӣ Раҳмон ба Рут ДРЕЙФУС гуфт, «Давлати Тоҷикистон мавқеи ниҳоии худро доир ба ин масъала дар асоси хулосаҳои гурӯҳи корӣ, ки бо назардошти афкори ҷомеа ва таҷрибаи ҷаҳонӣ бароварда мешавад, муайян хоҳад кард».