Имзои Ёддошти тафоҳум байни судҳои конститутсионии Тоҷикистон ва Арманистон

Душанбе, 15 май.( АМИТ «Ховар»,Раъно Нусратуллоева).-Дирӯз дар Китобхонаи миллии Тоҷикистон оид ба муҳокимаи лоиҳаи нави Қонуни конститутсионии Ҷумҳурии Тоҷикистон «Дар бораи суди конститутсионии Ҷумҳурии Тоҷикистон» семинар баргузор гардид. Дар кори семинар раиси Суди конститутсонии Ҷумҳурии Тоҷикистон Маҳкам Маҳмудов, раиси Суди Ҷумҳурии Арманистон Гагик Арутюнян, ҳамчунин намояндагони дастгоҳи иҷроияи Президенти Ҷумҳурии Тоҷикистон, Суди Олӣ, Суди олии иқтисодӣ, Шӯрои адлия, Прокуратураи генералӣ, Вазорати адлия, намояндагони дигар мақомоти ҳокимияти давлатӣ ва олимону мутахасисони ҳуқуқшинос иштирок ва суханронӣ намуданд.Дар оғози кори семинар аз ҷониби раиси Суди Ҷумҳурии Тоҷикистон Тоҷикистон Маҳкам Маҳмудов ва раиси Суди Ҷумҳурии Арманистон Гагик Арутюнян ҷиҳати густариши муносибатҳои байналмилалӣ ва ба роҳ мондани ҳамкориҳои мутақобилан судманди ду кишвар Ёддошти тафоҳум оид ба ҳамкорӣ байни судҳои конститутсионии давлатҳои ба ҳам дӯст ба имзо расид. Аз ҷониби ширкаткунандагони семинар лоиҳаи нави Қонуни конститутсионии Ҷумҳурии Тоҷикистон мавриди муҳокимаи ҳамаҷониба қарор дода шуда, ҷиҳати боз ҳам мукаммал намудани он таклифҳои мушаххас пешниҳод шуданд. Мақсад аз лоиҳаи нав боз ҳам тақвият бахшидани фаъолияти Суди конститутсионии Ҷумҳурии Тоҷикистон, ки ҳамчун мақомоти мустақили ҳокимияти судӣ бо мақсади таъмини волоият ва амалӣ бевоситаи конститутсионии Ҷумҳурии Тоҷикистон ва ҳуқуқи озодиҳои инсон ва шаҳрванд фаъолият менамояд, мебошад. Зикр кардан бамаврид аст, ки Қонуни конститутсионии «Дар бораи Суди конститутсионии Ҷумҳурии Тоҷикистон» ҳанӯз соли 1995 қабул гардида, дар ин муддат ба он зиёда аз даҳ маротиба тағйиру иловаҳо ворид шудаанд.