Китоб то ба хонанда расид

Душанбе, 2 май. (АМИТ «Ховар», Ҳотам Рабиев).-Муассисаи нашриявии «Адабиёти бачагона» баҳри иҷрои Паёми Президент ба Маҷлиси олии Ҷумҳурии Тоҷикистон зери унвони «Аз Паём то Паём» дар мувофиқа бо Вазорати фарҳанг нақшаи чорабиниҳо тартиб дод.Муассиса кори то ба хонанда бурда расонидани китобу маҷҷалаҳоро таъмин менамояд. Муассисаи нашриявии «Адабиёти бачагона» аввалин маротиба дар ҷумҳурӣ корвони намоиш-фурӯши китобҳои муассисаро таҳти унвони «Аниси кунҷи танҳоӣ китоб аст» аз моҳи декабри соли гузашта то апрели соли ҷорӣ дар ҷумҳурӣ ташкил намуд. Ва ин корвон тайи панҷ моҳ дар мувофиқа бо раисони вилояту шаҳру ноҳияҳо моҳи декабр ва январ дар шаҳри Душанбе, моҳи феврал дар шаҳру ноҳияҳои тобеи марказ (ноҳияи Рӯдакӣ, Ҳисор, Шаҳринав, Файзобод, шаҳри Ваҳдат, Турсунзода, Роғун); моҳи март дар шаҳру ноҳияҳои вилояти Суғд (ноҳияи Шаҳристон, Ғончӣ, Зафаробод, Бобоҷон Ғафуров, Мастчоҳ, шаҳрҳои Хуҷанд, Истаравшан, Конибодом, Исфара, Қайроққум) ва моҳи апрел дар вилояти Хатлон (шаҳри Қӯрғонтеппа, Кӯлоб, Норак, ноҳияҳои Абдураҳмони Ҷомӣ, Бохтар, Ҷалолуддини Румӣ, Вахш,) ташкил шуд. Дар намоиш-фурӯши китобҳои тозанашри муассиса дар ҷумҳурӣ зиёда аз 29 843 нусха китоб фурӯхта шуд. Дар радифи намоиш-фурӯши китобҳои тозанашри муассиса вохӯрии аҳли адаб Алӣ Бобоҷон, Ҷӯра Ҳошимӣ, Юсуфҷон Аҳмадзода, Муҳаммад Ғоиб, Муҳаммад Субҳон, Азизи Азиз ва Сайфулло Маҳкамов бо хонандагони макотиби таҳсилоти умумӣ дар мавзӯи «Вазъи кунунии нашри адабиёти кӯдакону наврасон дар ҷумҳурӣ» баргузор гардид.