Мулоқоти Ҳ. Зарифӣ бо Ҳ. Ҳаутала

Душанбе, 2 май. (АМИТ «Ховар»).-30 апрели соли 2013 вохӯрии вазири корҳои хориҷии Ҷумҳурии Тоҷикистон Ҳамрохон Зарифӣ бо ҳайати Ҷумҳурии Финляндия бо роҳбарии вазири рушди ҳамкориҳои байналмилалии ин кишвар хонум Ҳайди Ҳаутала баргузор гашт. Ҳайди Ҳауталаро Сафири Ҷумҳурии Финляндия дар Ҷумҳурии Тоҷикистон бо қароргоҳаш дар шаҳри Хелсинки хонум Туула Юрёла ҳамроҳӣ кард. Зимни вохӯрӣ ҷонибҳо масъалаҳоеро, ки ба муносибатҳои дуҷонибаи кишварҳо вобастагӣ доранд, аз ҷумла татбиқи барномаҳоеро, ки аз тарафи Ҷумҳурии Финляндия дар Тоҷикистон дар соҳаи ҳуқуқи инсон ба роҳ монда шудаанд ва лоиҳаҳое, ки дар оянда аз он ҷониб амалӣ хоҳанд гашт, баррасӣ намуданд. Инчунин дар мулоқот мавзӯи Конфронси сатҳи олӣ оид ба ҳамкории об, ки дар шаҳри Душанбе моҳи августи соли 2013 баргузор хоҳад гашт ва масъалаҳое, ки ба амнияти минтақавӣ вобастагӣ доранд, муҳокима шуданд.