Оғози «Форуми соҳибкории Душанбе- 2013» бо қироати Қуръони карим»

Душанбе, 18 май. (АМИТ «Ховар», Афшини Муқим).- Имрӯз дар Бӯстонсарои ҳукуматии беҳруназшаҳрии «Пуғус» дар чаҳорчӯбаи вохӯрии солонаи 38-уми Шӯрои мудирони Бонки Исломии Рушд бо дастгирии Корпоратсияи исломӣ оид ба рушди бахши хусусии Гӯруҳи Бонки Исломии Рушд ва таҳти сарпарастии Президенти Ҷумҳурии Тоҷикистон Эмомалӣ Раҳмон дар ҳамкорӣ бо Кумитаи давлатии сармоягузорӣ ва идораи амволи давлатии Ҷумҳурии Тоҷикистон «Форуми соҳибкории Душанбе- 2013» баргузор гардид.  Дар кори Форум муовини аввали Сарвазири Ҷумҳурии Тоҷикистон Матлубхон Давлатов, муовини Сарвазири Ҷумҳурии Тоҷикистон Муродалӣ Алимардонов, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Давлаталӣ Саидов, Директори Корпоратсияи хусусӣ оид ба бахши хусусӣ Холид- ал- Абудӣ, роҳаброни вазорату идораҳои давлатӣ, намояндагони бахши хусусӣ, аз ҷумла сармоягузорону соҳибкорони кишварҳои аъзои БИР иштирок намуданд. Форуми мазкур бо қироати оятҳое аз Қуръони карим оғоз ёфт. Сипас, муовини Сарвазири Ҷумҳурии Тоҷикистон Муродалӣ Алимардонов ва Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Давлаталӣ Саидов дар назди ҳозирин суханронӣ намуда, меҳмонон ва иштирокчиёни Форумро хайрамақдам гуфтанд. Матлубхон Давлатов – муовини авали Сарвазири Ҷумҳурии Тоҷикистон дар суханронии худ аз вазъи кунунии иқтисодӣ дар кишвар ва мавҷудияти имконоти зиёд дар самти рушди ҳамкориҳои босамар бо ниҳодҳои байналмилалии молиявӣ, аз ҷумла Бонки Исломии Рушд сухан гуфта, ҳавасмандии ҷониби Тоҷикистонро барои вусъати босамари ҳамкориҳо баён дошт. Баъдан, Директори Корпоратсияи хусусӣ оид ба бахши хусусӣ Холид- ал- Абудӣ аснои суханронии худ аз сатҳи феълии ҳамкориҳои Бонки Исломии Руш бо кишварҳои аъзо, аз ҷумла бо Тоҷикистон, ки ҳанӯз аз соли 1997 аъзои ин ниҳоди муътабари моливӣ мебошад, изҳори қаноатмандӣ намуд. Мавсуф баргузории вохӯрии солонаи 38-уми Шӯрои мудирони Бонки Исломии Рушд дар Тоҷикистонро фоли нек хонда, таъкид дошт, ки ин омил ҷиҳати рушди ҳамкориҳои кишварҳои аъзо бо Тоҷикистон нақши муассир хоҳад гузошт. Хамчунин дар доираи Форуми мазкур иштирокдорони он мавзӯоти дигари мавриди таваҷҷуҳро низ баррасӣ намуданд. Зимнан, Корпоратсияи Исломии Рушд ташкилоти бисёрҷониба буда, аъзои Гуруҳи Бонки Исломии Рушд мебошад ва ҳадафи асосии он дастгирии рушди иқтисодӣ ва мусоидат ба инкишофи бахши хусусӣ дар мамлакатҳои аъзоин он тавассути сармоягузорӣ мебошад.