Соҳибкори ободкор

 Кӯлоб, 25 май. (АМИТ «Ховар», С. Холов).-Ҳоҷӣ Қурбонови соҳибкор бо бародаронаш дар яке аз маҳаллаҳои калонтарини шаҳри Кӯлоб бунёди маҷмааи варзиширо ба нақша гирифта, дар як муддати кӯтоҳ қисми зиёди корҳои сохтмониро ба анҷом расониданд. .Дар корҳои сохтмонии маҷмааи варзишӣ 20 нафар сохтмончии маҳаллӣ ҷалб гардида, толору майдончаҳоро мутобиқ ба меъёрҳои байналхалқӣ бунёд менамоянд. Майдончаи футболи хурд пурра омода гардидааст ва дар толори варзишӣ охирин корҳои сохтмонӣ идома доранд. Ба гуфти соҳибкор аллакай таҷҳизоти варзишӣ харид шуда ва баъди анҷоми сохтмон дар толор насб мегарданд. Дар ҳудуди маҷмааи варзишӣ боғ низ бунёд хоҳад шуд, ки аллакай ниҳолакон шинонида шуда, нашъунамои хуб доранд. .Ба гуфти соҳибкор баъд аз як моҳ майдончаи футболи хурд ва толори варзишӣ мавриди истифода қарор мегирад ва то охири сол ҳавзи шиноварӣ ва корти теннис низ омода хоҳад шуд. Баъди пурра ба истифода додани маҷмааи варзишӣ 20 нафар сокини маҳаллӣ бо ҷои кор таъмин мегардад.