Суръати афзоиши истеҳсоли маҳсулоти саноатӣ- 105,8%

Душанбе, 10 май. (АМИТ «Ховар», Дилшодаи Хайруллоҳ) .- Аз рӯи маълумоти фаврӣ, ҳаҷми истеҳсоли маҳсулоти саноатӣ дар Ҷумҳурии Тоҷикистон дар 4 моҳи соли 2013 2 млрд. 961,9 млн. сомониро ташкил дода, суръати афзоиш дар миқёси ҷумҳурӣ нисбат ба ҳамин давраи соли гузашта ба 105,8% баробар шуд, ки ин нисбат ба моҳҳои январ-апрели соли 2012 ба маблағи 163 млн. сомонӣ зиёд аст. Афзоиш дар моҳи апрел нисбат ба моҳи апрели соли гузашта 6,5% ва ё 41,5 млн. сомониро ташкил дод. Дар саноати истихроҷ дар моҳҳои январ-апрели соли 2013 ба маблағи 386,4 млн. сомонӣ (13%-и маҳсулоти саноатии ҷумҳурӣ, афзоиш дар 4 моҳ асосан аз ҳисоби истихроҷи маъдани филизӣ 113,8 млн.сомонӣ) ва дар саноати коркард ба маблағи 1 млрд. 843,6 млн.сомонӣ (62,3%-и маҳсулоти саноатии ҷумҳурӣ, афзоиш дар 4 моҳ 10,6 млн. сомонӣ) маҳсулот истеҳсол гардидааст. Дар соҳаи истеҳсолу тақсими қувваи барқ, газ ва об ба маблағи 731,9 млн. сомонӣ ё 24,7%-и маҳсулоти саноатии ҷумҳурӣ истеҳсол гардида, афзоиши ҳаҷми истеҳсол дар 4 моҳ 38,6 млн. сомониро ташкил дод. Аз рӯи маълумоти фаврӣ корхонаҳои системаи Вазорати энергетика ва саноат дар моҳҳои январ-апрели соли 2013 ба маблағи 1 млрд. 167,7 млн. сомонӣ маҳсулот истеҳсол намуда, суръати афзоишро дар моҳи апрел ба 115,3% (афзоиш ба маблағи 37,8 млн. сомонӣ) ва дар 4 моҳ ба 120,6% (афзоиш ба маблағи 199,1 млн. сомонӣ) расонданд. Дар 4 моҳи соли 2013 нисбат ба ҳамин давраи соли гузашта, калонтарин корхонаҳои саноатӣ — КВД “Ширкати алюминийи Тоҷик”, КВД “Тоҷиксемент” ва корхонаҳои пахтатозакунӣ бо сабабҳои объективӣ ва субъективӣ, аз ҷумла, дар моҳи апрел КВД “Ширкати алюминийи Тоҷик” ба маблағи 5,7 млн.сомонӣ (дар 4 моҳ 30,1 млн.сомонӣ), КВД “Тоҷиксемент” ба маблағи 4,6 млн.сомонӣ (дар 4 моҳ ба маблағи 44,7 млн.сомонӣ), корхонаҳои пахтатозакунӣ мутаносибан ба маблағи 33,8 ва 73,7 млн.сомонӣ ҳаҷми истеҳсоли маҳсулоти саноатиро ба маблағи умумии 148,5 млн.сомонӣ кам карданд. Дар таркиби маҳсулоти саноатии ҷумҳурӣ ҳаҷми истеҳсоли КВД “Ширкати алюминийи Тоҷик” ҳамагӣ 6,2%-ро ташкил медиҳад.Аз 11 вазорату идораҳои шуғли саноатидошта, дар 4 моҳи соли 2013 корхонаҳои саноатии Вазорати меҳнат ва ҳифзи иҷтимоии аҳолӣ 94,2% (нисбат ба ҳамин давраи соли гузашта 44,1 ҳазор сомонӣ кам), корхонаҳои пахтатозакунӣ 76,6% (73,7 млн.сомонӣ кам), ҷамъияти нобиноён 41,5% (338,4 ҳазор сомонӣ кам), ҷамъияти кару гунгҳо 63,9% (176,1 ҳазор сомонӣ кам) ва корхонаҳои бе тобияти идоравӣ 77,6% (92,1 млн.сомонӣ кам) ҳаҷми маҳсулоти саноатиро нисбат ба 4 моҳи соли 2012 коҳиш доданд. Дар ин бора ба мухбири АМИТ «Ховар» аз котиботи Вазорати энергетика ва саноати Ҷумҳурии Тоҷикистон иттилоъ доданд.