Таъмини зиндагии шоиста ҳадафи ҳукумат аст

Душанбе, 2 май.(АМИТ «Ховар», Марзия Саидова).-Вакилони палатаи поёнии Парлумони мамлакат Махфират Хидирова ва Маҳмадалӣ Ватанов бо интихобкунандагони худ вохӯрда, роҷеъ ба Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон сухан гуфтанд. Вакилон дар вохӯрӣ иброз доштанд, ки мақсади Ҳукумати Ҷумҳурии Тоҷикистон тавре ки аз Паёми Президент бармеояд, пеш аз ҳама таъмини зиндагии шоиста барои ҳар як сокини ҷумҳурист. Бинобар ин моро зарур аст, ки барои нигоҳдории суръати пешрафт, инчунин ба хотири таъмини рушди минбаъдаи устувори иқтисоди миллӣ ва дар ин замина баланд бардоштани сатҳу сифати зиндагии аҳолии кишвар омилҳои зарурӣ ба инобат гирифта шаванд. Намояндагони палатаи поёнии Парлумони мамлакат ҳамзамон иброз доштанд, ки сарфи назар аз таъсири манфии буҳрони молиявию иқтисодии ҷаҳонӣ ва дигар мушкилоти мавҷуда Ҳукумати Ҷумҳурии Тоҷикистон тавонист, ки иҷрои барномаҳои қабулкардаи худ ва рушди тадриҷии иқтисоди миллиро дар ҳафт соли охир таъмин намояд. Вакилон доир ба масъалаҳои иҷтимоӣ ибрози назар намуда, афзуданд, ки маблағгузории соҳаҳои иҷтимоӣ дар кишвар сол аз сол зиёд гардида, дар соли равон он 6,4 миллиард сомониро ташкил медиҳад, ки он нисфи буҷаи давлатист. Дар анҷоми мулоқот вакилон Махфират Хидирова ва Маҳмадалӣ Ватанов ба саволҳои сершумори интихобкунандагони худ посух гуфтанд. Мавриди зикр аст, ки аз 30 апрел то 9 май вакилони палатаи поёнии Парлумони мамлакат ба минтақаҳо сафар карда, бо интихобкунандагони худ мулоқот анҷом медиҳанд.