$12 млн. барои беҳсозии хизматрасонии обтаъминкунӣ

Душанбе, 24 июн.(АМИТ «Ховар», Марзия Саидова).-Созишномаҳои кафолатӣ байни Ҷумҳурии Тоҷикистон ва Бонки аврупоии таҷдид ва рушд оид ба лоиҳаи беҳтар намудани системаи обтаъминкунии шаҳрҳои шимол ва ҷануби Тоҷикистон, марҳилаи 2 ва созишномаҳои қарзӣ (кредитӣ) байни Корхонаи воҳиди давлатии «Хоҷагии манзилию коммуналӣ» ва Бонки аврупоии таҷдид ва рушд оид ба лоиҳаи беҳтар намудани системаи обтаъминкунии шаҳрҳои шимол ва ҷануби Тоҷикистон, марҳилаи 2 дар ҷаласаи навбатии Шӯрои Маҷлиси намояндагон, ки имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров баргузор гардид, муҳокима шуданд.   Ин санадҳо бо мақсади бечуну чаро ва сари вақт пардохт намудани қисми маблағ ё маблағи пурраи қарзро мувофиқи Созишномаи кредитӣ, ё дар муҳлати муқарраршуда ва ё дар муддати кӯтоҳтар, ё ба таври дигар, саривақт иҷро намудани ҳамаи уҳдадориҳои қарзгирро, ки дар созишномаи кредитӣ пешбинӣ шудаанд, кафолат медиҳад. Зикр гардид, ки КВД «Хоҷагии манзилию коммуналӣ» (қарзгир) лоиҳаеро татбиқ мекунад, ки махсус барои он таҳия шуда, ба қарзгир дар беҳтар намудани сифати хизматрасонии обтаъминкунии шаҳрҳои Панҷакент, Шаҳристон, Истаравшан ва Зафарободи вилояти Суғд, ноҳияҳои Ёвон ва Ҷалолиддини Румии вилояти Хатлон кӯмак мерасонад. Инчунин дар созишномаи кредитӣ байни қарзгир ва Бонк («Созишномаи кредитӣ», тавре дар муқаррарот ва Шартҳои Стандартӣ омадааст), Бонк розигӣ медиҳад, ки ба қарзгир ба маблағи 12 миллион доллари амрикоӣ ҷудо намояд. Аз ҷумла, 7 миллион доллари ИМА барои шаҳрҳои шимоли ҷумҳурӣ ва 5 миллион доллари ИМА барои ноҳияҳои ҷануби кишвар, мувофиқи муқаррарот ва шартҳои созишнома, пешбинӣ шудааст.