Ифтитоҳи хатҳои нави интиқоли барқи Тоҷикистон ба Афғонистон

Душанбе,19 июн. (АМИТ «Ховар», Фарзонаи Давлат).- 18-уми июн маросими расмии ифтитоҳи хатҳои нави интиқоли барқ аз Ҷумҳурии Тоҷикистон ба Ҷумҳурии Исломии Афғонистон доир шуд, ки дар он намояндагони Агентии ИМА оид ба рушди байналмилалӣ (USAID), Хазинаи Оғохони ИМА ва ширкати «Помир Энерҷӣ» иштирок намуданд.Хатҳои нави интиқоли барқ аз Тоҷикистон ба Афғонистон аҳолии вулусволӣ (ноҳия)-и Шуғнони вилояти Бадахшони Афғонистонро бо барқ таъмин мегардонад. Гуфта мешавад, ки USAID тавассути барномаи минтақавии таъмини амнияти энергетикӣ, самаранокӣ ва тиҷорат дар Осиёи Марказӣ (RESET) барои кашидани хатҳои фаромарзии интиқоли барқ ба деҳаи Виёди ноҳияи Шуғнон ва ду деҳаи хурди Саричашмаи Афғонистон — Тижмой ва Пидруд 785 ҳазор доллари ИМА ҷудо намудааст. Ин тасмимро хонум Кейти Макдоналд, роҳбари намояндагии USAID дар Тоҷикистон зимни суханронии хеш дар маросими ифтитоҳи хатҳои нави интиқоли барқ иброз дошт.