Нахустин ҷаласаи Шӯрои нозирони Фонди дастгирии соҳибкорӣ

Душанбе, 18 июн. (АМИТ «Ховар», Бекназари Абӯбакр). — Дирӯз, 17 июн дар ҷаласаи якуми Шўрои нозирони Фонди дастгирии соҳибкории Кумитаи давлатии сармоягузорӣ ва идораи амволи давлатии Ҷумҳурии Тоҷикистон доир гардид.Шўрои нозирон аз 7 аъзо иборат буда, ба он муовинони вазоратҳои адлия, молия, рушди иқтисод ва савдо, Хадамоти зидди инҳисорӣ ва раиси Ассосиатсияи бонкдорони Тоҷикистон шомиланд.Ба кори ҷаласа раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, раиси Шўрои нозирони Фонди дастгирии соҳибкорӣ Давлаталӣ Саидов оғоз бахшида, зикр намуд, ки бо мақсади рушди соҳибкорӣ, дастгирии истеҳсолкунандагони ватанӣ ва афзун намудани истеҳсоли маҳсулоти дохилӣ тибқи қарори Ҳукумати Ҷумҳурии Тоҷикистон аз 5-уми феврали соли 2013 №34 дар назди Кумита Муассисаи давлатии “Фонди дастгирии соҳибкорӣ” таъсис дода шуд.Ҳадаф аз таъсиси Фонди мазкур ба роҳ мондани дастгирии воқеии давлатии фаъолияти субъектҳои соҳибкорӣ ва ҳавасмандгардонии онҳо аз ҷониби мақоми ваколатдори давлатӣ дар соҳаи дастгирии давлатии соҳибкорӣ дар корҳои созандагию бунёдкорӣ, дар самти пешниҳод намудани қарзҳои хурду миёна бо фоизҳои муносиб, инчунин таъмини рақобатнокии низоми қарздиҳии бонкӣ буда, дар ин замина ҳарсола аз ҳисоби буҷети давлатӣ маблағҳои муайян дар қонунгузорӣ пешбинӣ шуда, ба ин васила ҷойҳои нави корӣ таъсис дода мешавад.Барои таъсис додани Фонди мазкур дар буҷети давлатии соли 2013-ум 5 млн. сомонӣ пешбинӣ шудааст. Дар баробари ин, маблағҳои баргардонидашудаи қарзе, ки дар ҳаҷми 28 млн. сомонӣ аз буҷети ҷумҳуриявӣ ба Кумита барои дастгирии соҳибкорӣ ҷудо гардидааст, пурра ба Фонди мазкур ҳамчун маблағҳои гардишӣ гузаронид ашуда, дар солҳои оянда маблағгузории он аз ҳисоби буҷети ҷумҳуриявӣ то 100 млн. сомонӣ расонида мешавад.«Дар ин замина, моро зарур аст, ки вобаста ба самаранок истифодабарии маблағҳои ҷудогардида, фаъолияти шаффофи Фонд ва пешниҳод намудани қарзҳои имтиёзнок ба ташаббусҳои созандаи соҳибкорон мусоидати ҳамаҷониба намоем», — тазаккур дод. Д. Саидов.Аъзои Шўро ҳамзамон Низомнома ва Дастурамал “Дар бораи истифодаи маблағҳои Фонд вобаста ба самтҳо ва барномаҳои давлатии соҳибкорӣ” ва омӯзиши лоиҳаҳои Нақшаҳои-тиҷоратӣ, ки аз ҷониби соҳибкорон барои дарёфти қарз ба Фонд ворид гардидаанд, мавриди баррасӣ қарор доданд.