Осиёи Марказӣ барои сулҳ, бидуни силоҳи ҳастаӣ

Душанбе, 17 июн.(АМИТ «Ховар», Марзия Саидова).-Кишварҳои абарқудрати ҷаҳонро, ки дорои силоҳи ҳастаианд, мебояд иродаи нек нишон диҳанд, то уҳдадориҳои худро ҷиҳати коҳиши силоҳи ҳастаӣ иҷро намоянд. Ин матлабро Саттор Холов-муовини раиси Кумита оид ба тартиботи ҳуқуқӣ, мудофиа ва амнияти Маҷлиси намояндагон дар суҳбати мизи мудаввар, ки таҳти унвони «Осиёи Марказӣ барои сулҳ, бидуни силоҳи ҳастаӣ» дар Душанбе доир гардид, иброз дошт. Чорабинии мазкур бо ибтикори Маркази тадқиқоти стратегии назди Президенти ҷумҳурӣ дар ҳамкорӣ бо Сафорати Ҷумҳурии Қазоқистон дар Ҷумҳурии Тоҷикистон созмон дода шуда, дар он намояндагони корпусҳои дипломатии муқими Тоҷикистон, сиёсатшиносон, олимону коршиносон ширкат доштанд. Зикр гардид, ки таъмини амнияти минтақаи Осиёи Марказӣ, хусусан аз хатару таҳдидҳои ҷаҳони муосир, яке аз масъалаҳои муҳим маҳсуб меёбад. Хусусан дар мавриди афзоиши аслиҳаи ядроӣ. Дар самти ҷилавгирӣ аз ин хатарҳо ва таъмини амнияти минтақа кишварҳои Осиёи Марказӣ ва мардуми сайёраро лозим аст, ки дар ҳамкорӣ ва ҳамбастагӣ тадбирҳои зарурӣ андешанд. Вакили Парлумони Тоҷикистон дар гузориши худ доир ба мавқеи стратегии Тоҷикистон дар самти ҷилавгирӣ аз паҳншавии силоҳи ҳастаӣ дар миқёси ҷаҳон ва уҳдадориҳои Ҷумҳурии Тоҷикистон дар ин самт ибрози назар намуд. Мавсуф зикр кард, ки дар ин масъала Парлумони Тоҷикистон маҷмӯи санаду қонунҳоро қабул намудааст, ки ба таъмини амнияти минтақа ва кишварамон мусоидат менамояд. Қабули лоиҳаи Қонуни Ҷумҳурии Тоҷикистон «Дар бораи муомилот бо партовҳои радиоактивӣ» аз сӯи вакилони Парлумони Тоҷикистон шаҳодати гуфтаҳост. Дар навбати худ Агибай Смагулов- сафири Қазоқистон дар Тоҷикистон зикр кард, ки ҳифз ва таҳкими амнияти кишварҳои Осиёи Марказӣ аз таҳдидҳои ҷаҳони муосир, хусусан ҷилавгирӣ аз силоҳи ҳастаӣ ва мусаллаҳшавии бошитоб дар миқёси ҷаҳон яке аз масъалаҳои ҳассос ва умда ба шумор меравад. Дипломати қазоқ афзуд, ки давлатҳои Осиёи Марказӣ аз рӯзҳои нахустини соҳибистиқлол гардиданашон муборизаро алайҳи озмоиши яроқи ҳастаӣ, паҳн нагардидан ва коҳиш додани он пурзӯр намудаанд. Ин аст, ки 29 августи соли 1991 бо Фармони Президенти Қазоқистон Нурсултон Назарбоев озмоишгоҳи ҳастаии Семипалатинск, ки дар замони Итттиҳоди Шӯравӣ дар ин тамрингоҳ 500 озмоши ядроӣ гузаронида шуда буд, баста шуд. Иштирокдорони суҳбати мизи мудаввар ҳамзамон доир ба масъалаҳои нақши Тоҷикистон дар таҳкими сиёсати бидуни силоҳи ҳастаӣ дар Осиёи Марказӣ, мақоми ғайриҳастаии Қазоқистон ҳамчун кафили амният ва оромӣ дар Осиёи Марказӣ ва дурнамои вазъи сиёсию низомӣ дар Осиёи Марказӣ баъди соли 2014 табодули назар карданд.16.45.