Вохӯрии директори АНМН дар доираи IDEC

Душанбе, 6 июн. (АМИТ «Ховар»).- Дар доираи Конференсияи XXX байналмилалии мақомоти ҳифзи ҳуқуқ оид ба мубориза бо муомилоти ғайриқонунии маводи нашъадор (IDEC-XXX), ки 5 июни соли 2013 дар шаҳри Маскави Федератсияи Русия ба кори худ оғоз кард, вохӯрии директори Агентии назорати маводи нашъаовари назди Президенти Ҷумҳурии Тоҷикистон генерал-лейтенанти милитсия Рустам Назаров бо Директори Департаменти мубориза бо мухаддироти ИМА (ДЕА) хонум Мишел Леонхарт баргузор гардид.Тавре ки ба АМИТ «Ховар» аз маркази матбуоти АНМН хабар доданд, дар вохӯрӣ ҷонибҳо масъалаҳои инкишофи дурнамои ҳамкориҳои дуҷонибаро муҳокима намуда, инчунин оид ба вазъи вобаста ба мухаддирот дар минтақа табодули назар карданд.Хонум Леонхарт ба фаъолияти мақомоти ҳифзи ҳуқуқ ва сохторҳои қудратии ҶТ баҳои баланд дода, иброз намуд, ки минбаъд ҳам ДЕА ба мақомоти ҳифзи ҳуқуқи Ҷумҳурии Тоҷикистон дар масъалаҳои мубориза бо муомилоти ғайриқонунии маводи нашъадор кӯмакҳои амиқ мерасонад.