Таъсири манфии корхонаҳои саноатии Ӯзбекистон ба муҳити зист

Душанбе, 30 июл. (АМИТ «Ховар», Зарина Саидова)- Кормандони раёсати ҳифзи муҳити зисти вилояти Суғд дар 16 мавзеи ноҳияҳои назди марзии Мастчоҳ, Спитамен, Зафаробод ва Бобоҷон Ғафуров мониторинги вазъи экологӣ доир намуда, ошкор сохтанд, ки корхонаҳои саноатии Ӯзбекистон ба вазъи муҳити зисти ин минтақа таъсири манфӣ мерасонанд. Дар ноҳияи Мастчоҳ таъсири манфии корхонаи гидрометаллургии шаҳри Олмалиқи Ӯзбекистон ба мушоҳида мерасад. «Партовҳои моеъи ин корхона ба сарбанди каме дар баландӣ воқеъ, ки зери пастии он заминҳои обёришавандаи ин ноҳия ҷойгиранд, рехта мешаванд. Ин партовҳои моеъ, ки дар таркибашон маводи зараровар, аз ҷумла металлҳои вазнин мавҷуданд, ба обҳои зеризаминии атроф роҳ ёфта, дар натиҷа дар ин мавзеъ беҳосилшавии заминҳо ба мушоҳида мерасад», — зикр кард сардори раёсат Хуршед Саидов.-То ҳанӯз тамоми ҳаҷми зарари расонидашуда ба муҳити зисти вилоят аз фаъолияти корхонаҳои саноатии кишвари ҳамсоя муайян нашудааст. Макони партовҳои саноатии воқеъ дар ноҳияи Спитамен низ боз як омили таъсири манфӣ ба муҳити зист аст, зеро ки дар шаҳри Бекободи Ӯзбекистон, ки бо ноҳияи Спитамен ҳаммарз аст, корхонаҳои гидрометаллургӣ ва истеҳсоли семент фаъолият доранд ва ба вазъи экологии ин минтақа таъсири манфӣ мерасонанд, — гуфт Х. Саидов.