Мулоқоти директори МТС бо Сафири Озарбойҷон

Душанбе, 14 август. (АМИТ «Ховар»). – 13 август дар шаҳри Душанбе мулоқоти директори Маркази тадқиқоти стратегии назди Президенти Тоҷикистон Бобохон Маҳмадов бо Сафири Ҷумҳурии Озарбойҷон дар ҶТ Аббосалӣ Ҳасанов баргузор гардид. Тавре ки аз Сафорати Озарбойҷон дар ҶТ ба АМИТ «Ховар» хабар доданд, зимни мулоқот дурнамои ҳамкории Озарбойҷону Тоҷикистон дар бахшҳои мухталиф, имконоти сармоягузории соҳибкорони Озарбойҷон ба иқтисодиёти Ҷумҳурии Тоҷикистон мавриди муҳокима қарор гирифт. Бобохон Маҳмадов изҳор дошт, ки Ҷумҳурии Тоҷикистон ба технологияҳои нав ва сармоягузорӣ ниёз дошта, аз ин лиҳоз барои сармоягузорони хориҷӣ шароити мусоид фароҳам меоварад. Аббосалӣ Ҳасанов дар навбати худ аз дастовардҳои иқтисодии Озарбойҷон ва имкониятҳои соҳибкорони кишвараш дар мавриди сармоягузорӣ ба бахшҳои мухталифи иқтисодиёти кишварҳои бародар нақл кард.Ҷонибҳо ҳамчунин дар мавриди равандҳои сиёсӣ, иқтисодӣ ва иҷтимоии минтақа табодули афкор намуданд.