Даъвати Оқил Оқилов аз иштирокдорони Иҷлосияи 68-уми МУ СММ

Душанбе, 26 сентябр. (АМИТ «Ховар», Зарангези Латиф).-Нимаи дуюми рӯзи 25-уми сентябри соли равон Сарвазири Ҷумҳурии Тоҷикистон Оқил Оқилов дар Ичлосияи 68-уми МУ СММ суханронӣ кард. Оқил Оқилов зимни суханронии худ изҳор дошт, ки ноил гардидан ба рушди устувор дар оянда аз татбиқ ва маблағгузории барнома ва лоиҳаҳои бузурги ба нақша гирифташуда вобастагии калон дорад. Бо назардошти нақши калидӣ доштани захираҳои обӣ дар роҳи расидан ба ҳадафҳои рушди устувор Оқил Оқилов изҳор дошт, ки Тоҷикистон аз қарорҳои МУ СММ, ки бо ташаббуси Тоҷикистон ва ҷониби давлатҳои узви СММ қабул шудаанд, истиқбол менамояд ва барои амалӣ намудани нақшаю барномаҳои нави ҳамкорӣ дар соҳаи об ва ҳифзи захираҳои Обӣ тадбирҳои зарурӣ меандешад. Оқил Оқилов аз иштирокчиёни иҷлосия даъват ба амал овард, ки аз ташаббуси нави ҷониби Тоҷикистон доир ба тахияи дурнамои масъалаҳо доир ба об барои давраи баъди соли 2015, ки аз ҷониби Президенти Ҷумҳурии Тоҷикистон дар конфронси байналмилалии Душанбе оид ба ҳамкориҳо дар соҳаи об-2013 пешниҳод гардидааст, ҷонибдорӣ намоянд. Дар баробари ин Сарвазири мамлакат ҳамзамон таъмин, дастрасии пурра ва рушди соҳаи энергетикаро омили дигари муҳим барои расидан ба рушди воқеии устувор арзёбӣ карда, изхор дошт, ки тадбирҳои давлат ва Ҳукумати Ҷумҳурии Тоҷикистон дар роҳи татбиқи лоиҳаҳои гидроэнергетикӣ ба хотири беҳдошти сатҳи некӯаҳволии сокинони мамлакат пеш гирифта шудаанд ва аз ин хотир бояд, ки масъалаи дастрасӣ ба энергетика мақоми баробар ба ҳадафҳои рушди ҳазорсоларо дошта бошад. Дар идомаи суханронии хеш Оқил Оқилов аз рушди ҳамкориҳои минтақавӣ ёдовар шуда, изҳор дошт, ки таҳкими раванди ҳамкориҳои минтақавӣ аз ҳар ҷиҳат ба вазъ ва суботи Афгонистони ҳамсоякишвар вобастагӣ дорад ва бояд нақши ҷомеаи байналмилалӣ дар ба эътидол овардан ва таъмини рушди иқтисодиёти Афғонистон боз ҳам бештару беҳтар гардонида шавад. Сарвазири мамлакат Оқил Оқилов зимни суханронӣ аз минбари баланди МУ СММ ҳамзамон оид ба тадбирҳои муштарак дар роҳи мубориза бар зидди терроризму ифротгароӣ, пешгирии гардиши ғайриқонунии маводи нашъадор ва таъмини амнияту оромӣ дар минтақа изҳори назар кард.