Иштироки Э. Раҳмон дар маросими ба истифода додани боғи фарҳангӣ- фароғатӣ ва мулоқот бо сокинони ноҳияи Ҷиргатол

Душанбе, 26 сентябр. (АМИТ «Ховар»). — Ҳамчунин бо иштироки сарвари давлати Тоҷикистон дар маркази ноҳияи Ҷиргатол боғи фарҳангӣ- фароғатӣ ба истифода дода шуд .  Боғи фарҳангӣ дар як муддати кўтоҳ бунёд ёфта, ба як маркази дилхушии кўдакон табдил гардидааст. Боғи мазкур аз маҷмааҳои дилхушӣ ва атраксионҳои гуногун иборат мебошад. Президенти мамлакат ба шароити мавҷудаи истироҳату фароғат дар боғ шинос шуда, таъкид намуд , ки ба сокинон ва меҳмонон дар оянда хизматрасонро дар сатҳи зарурӣ ба роҳ монда шавад . Дар боғи фарҳангӣ- фароғатии ноҳияи Ҷиргатол Президенти Ҷумҳурии Тоҷикистон Эмомалӣ Раҳмон суханронӣ намуда, ҳамчунин бо фаъолони ноҳия суҳбати озоду самимӣ анҷом дод . Аз ҷумла Сарвари давлат Эмомалӣ Раҳмон зимни суханронӣ таъкид намуд, ки дар солҳои соҳибистиқлолии мамлакат ноҳияи Ҷиргатол ободу зебо гардида , дар ин давра иншооти гуногун сохта, ба истифода дода шудааст. Зикр гардид, ки дар ноҳияи Ҷиргатол тайи солҳои соҳибистиқлолии кишвар 400 иншооти муҳим , аз ҷумла 39 пул , 21 мактаби нав ва 20 муассисаи табобатӣ сохта шуда, 52 адад трансформатору зеристгоҳҳои барқӣ харидорӣ ва васл карда шудаанд . Инчунин 76 мактаби таҳсилоти ҳамагонӣ таъмир карда шуда, ба 35 деҳаи ноҳия хатти оби нўшокӣ кашида шудааст. Картошкапарварӣ ҳамчун бахши сердаромади соҳаи кишоварзӣ сол то сол рушд карда, майдони кишти он бо истифода аз имкониятҳои мавҷуда васеъ карда мешавад . Ҳангоми суханрони Президенти мамлакат таъкид намуд , ки Тоҷикистон аз кишвари воридкунанда ба мамлкати содиркунандаи картошка табдил ёфтааст . Ҳамчунин зикр гардид, ки истеҳсоли картошка имсол дар ҷумҳурӣ 1 миллион тоннаро ташкил дода, дар 3 соли оянда ба 1,5 миллион тонна расонида мешавад . Маводи муфассал доир ба ин ва дигар мавзўъҳои фаъолияти Сарвари давлат Эмомалӣ Раҳмон, аз ҷумла матн, акс ва навори видеоро метавонед аз сомонаи расмии Президенти Ҷумҳурии Тоҷикистон «www.president.tj» дастрас намоед.