Муҳоҷири бемор ба ватан равон карда шуд

Душанбе, 26 сентябр. (АМИТ «Ховар», Л. Қосимова). -Ба дафтари Намояндагии Хадамоти муҳоҷирати Ҷумҳурии Тоҷикистон дар Федератсияи Русия муҳоҷири меҳнатӣ- шаҳрванди ҶТ, сокини шаҳри Кӯлоб Ҷумахонова Озода Мадғафуровна муроҷиат намуда, хоҳиш кард, ки ўро бо сабаби беморӣ ва надоштани имконияти молиявӣ ба Ватан равон кунанд. Озода Ҷумахонова дар давоми 6 моҳи охир дар яке аз ширкатҳои таҳиякунандаи ғизои нимхом дар шаҳри Маскав кор карда, корхона ӯро бо хобгоҳ ва маоши хуб таъмин мекардааст. Озода маоши моҳи охири кориро гирифта, нияти ба ватан баргаштанро доштааст, аммо аз сабаби бемории ногаҳонӣ натавонистааст ба кор барояд. Аз сабаби надоштани суғуртаи тиббӣ, дар беморхонаҳо имкони муолиҷа карданро надошт.Бо назардошти вазъият 19 сентябр бо мусоидати Намояндагӣ ва КВД «Тоҷикхориҷакор» муҳоҷири меҳнатӣ бо ҳавопаймои хатсайри Маскав-Кӯлоб ба Ватан гуселонида шуд.Ин бори аввал нест, ки муҳоҷирони меҳнатӣ ба Намояндагӣ аз сабаби надоштани суғуртаи тиббӣ ва дар ин замина надоштани имкони дастрасӣ ба хизматрасонии ройгони тиббӣ муроҷиат менамоянд. Дар айни замон дар ҳудуди Русия ширкатҳои суғуртавӣ фаъолият доранд, ки яке аз самтҳои асосии фаъолияташон маҳз барои муҳоҷирони меҳнатӣ равона шудааст. Ҳаҷми суғурта вобаста ба муҳлат на он қадар гарон аст, вале дар ҳолатҳои ғайричашмдошт метавонад кафолати гирифтани хизматрасонии саривақтӣ бошад.Дар ин бора ба АМИТ «Ховар» аз Намояндагии ХМ дар ФР хабар доданд.