Вазъи хадамоти геронтологӣ дар Тоҷикистон

Душанбе, 11 сентябр. (АМИТ «Ховар», Л. Қосимова). — 13 сентябри соли равон дар Маркази тадқиқоти стратегии назди Президенти ҶТ дар мавзӯи «Вазъи хадамоти геронтологӣ (илм дар бораи пиршавии бадан) дар Тоҷикистон, мушкилот ва роҳҳои ҳалли он» мизи мудаввар баргузор мегардад. Дар чорабинӣ муовини вазири тандурустии Тоҷикистон С. Раҳмонов, муовини раиси Маркази тадқиқоти стратегии назди Президенти ҶТ С. Сафаров, раиси Маркази геронтологии Осиёи Марказӣ С. Камолова ва дигарон иштирок хоҳанд кард. Дар мизи мудаввар муовини вазири тандурустии Тоҷикистон С. Раҳмонов дар мавзӯи «Вазъ ва дурнамои рушди хадамоти геронтологӣ дар Тоҷикистон» ва раиси Маркази геронтологии Осиёи Марказӣ С. Камолова оид ба «Дастрасии пиронсолон ба соҳаи тандурустӣ аз рӯи хулосаи миллӣ оид ба пиршавӣ. Таҷрибаи ташкилотҳои ҷамъиятӣ дар таъмини зиндагии сазовор дар пиронсолӣ» маърӯза хоҳанд кард. Чорабинии мазкур аз ҷониби Маркази геронтологии Осиёи Марказӣ, Вазорати Тандурустии ҶТ ва Маркази тадқиқоти стратегии назди Президенти ҶТ баргузор хоҳад гашт. Пас аз маърӯзаҳо масъалаҳои марбут ба геронтология баррасӣ мегарданд. Инчунин дар назар аст, ки дар конфронс ба духтурони оилавии соҳаи геронтология шаҳодатномаҳо (сертификат) супорида шаванд. Дар фарҷоми чорабинӣ аз ҷониби иштирокчиён қарорҳо қабул хоҳанд гашт.