Конфронс дар мавзӯи тағйири иқлим

Душанбе, 20 ноябр. (АМИТ «Ховар»,  Лутфия  Эшонқулова).- Дар   шаҳри  Варшава  Конфронси  19 – уми Ҷонибҳои Муоҳадаи  СММ дар  мавриди  тағйири  иқлим  ва Машварати  9 – уми  Ҷонибҳои  Муоҳадаи  Киото,  ҳамчунин  иҷлосияҳои   навбатии   мақомоти  ёрирасони  СММ  идома  доранд. 
 
Назар  ба  хабари Муассисаи давлатии ҳавосанҷии  ҶТ,  дар  кори  конфронс ҳайати Тоҷикуистон иборат  аз   намояндагони Муассисаи давлатии  ҳавосанҷӣ,  Кумитаи  ҳифзи  муҳити  зисти  назди  Ҳукумати  ҶТ, ҳамчунин коршиносони Барномаи рушди СММ  дар  Тоҷикистон  оид ба  масъалаи  тағйири  иқлим  ширкат  доранд. 
 
Вазифаи  асосии  конфронс  иборат  аз  муайян  намудани меъёрҳои  мушаххаси  созишномаи  нави  ҷаҳонӣ   оид ба  иқлим  дар   заминаи  одилона  бидуни  истинои  кишварҳои  ҷаҳон  ва  ташаккули   харитаи роҳ  барои  таҳияи  ин  созишнома  мебошад. Мувофиқи  қарорҳои  қаблан  қабулшуда, созишномаи ҷаҳонӣ бояд на дертар  аз  соли  2015  таҳия  гардида ва  соли  2020  ба  мавқеи  иҷро расад.