Теъдоди нозирони САҲА назар ба ИДМ бештар аст

Душанбе, 5 ноябр.(АМИТ «Ховар», Марзия Саидова).-Беш аз 500 нозири байналмилалӣ ҷараёни баргузории интихоботи Президенти Ҷумҳурии Тоҷикистонро, ки фардо, 6 ноябри соли 2013 баргузор мегардад, мушоҳида менамоянд. Аз Комиссияи марказии интихобот ва раъйпурсии Ҷумҳурии Тоҷикистон ба АМИТ «Ховар» иттилоъ доданд, ки қисмати бештари нозирони хориҷиро ҳайати нозирони Иттиҳоди Давлатҳои Мустақил /ИДМ/ 159 нафар, Дафтари ниҳодҳои демократӣ ва ҳуқуқи инсони Созмони амният ва ҳамкории Аврупо /САҲА/ 183 нафар, Ассамблеяи байнипарлумонии ИДМ 35 нафар ва Ассамблеяи Парлумонии САҲА 48 нафар ташкил медиҳанд. Ҳамзамон раванди баргузории интихоботи президентиро дар Тоҷикистон 9 нафар нозир аз Парлумони Аврупо, 8 нафар аз Созмони Ҳамкории Шанхай, 33 нафар нозирони байналммилалӣ аз Амрико, 8 нафарӣ аз Чину Британияи Кабир ва Ҷопон, инчунин 2 нафар аз Арманистон ва 1 нафар аз Фаронса мушоҳида менамоянд. Маъракаи муҳими сиёсӣ-интихоботи Президенти Ҷумҳурии Тоҷикистон фардо, 6 ноябр аз соати 6:00-и субҳ оғоз гардида, соати 20:00 -и шом анҷом меёбад. Дар интихоботи Президенти Тоҷикистон 6 номзад ба мансаби Президенти Ҷумҳурии Тоҷикистон бо ҳам рақобат менамоянд.