Мулоқоти Ш. Султонов бо Р.Демченко

Душанбе, 6 декабр. (АМИТ «Ховар»).- Чанде пеш мулоқоти Сафири Тоҷикистон дар Украина Шӯҳрат Султонов бо муовини аввали Вазири корҳои хориҷии Украина Руслан Демченко баргузор гардид. Тавре ки аз Сафорати Тоҷикистон дар Украина хабар доданд, ҷонибҳо дар ҷараёни мулоқот вазъу дурнамои муносибатҳои дуҷонибаро мавриди муҳокима қарор доданд. Ба масоили марбут ба иҷрои аҳду паймонҳои қаблӣ ва рушди минбаъдаи ҳамкории мутақобилан муфиди иқтисодӣ таваҷҷуҳи хоса зоҳир гардид. Дар робита бо ин, аҳамияти татбиқи қарорҳои ҷаласаи Комиссияи байниҳукуматии Тоҷикистону Украина, ки моҳи апрели соли равон дар шаҳри Душанбе доир шуда буд, ҳамчунин иҷрои Барномаи ҳамкории байни вазоратҳои корҳои хориҷии ҳар ду кишвар таъкид гардид. Шӯҳрат Султонов аз ҷониби Украина хоҳиш намуд, ки масъалаи зудтар ҷудо кардани қитъаи замин барои сохтмони бинои Сафорати Тоҷикистон дар шаҳри Киев тезонида шавад.