Моҳии Ҳамадонӣ дар Душанбе ва Кӯлоб

Ҳамадонӣ, 25 январ. (АМИТ «Ховар», С. Холов).-Дар ноҳияи ба номи Мир Саид Алии Ҳамадонӣ бо мақсади рушди соҳаи моҳипарварӣ ва зиёд намудани истеҳсоли маҳсулот аз ин ҳисоб Хоҷагии давлатии моҳипарварӣ фаъолият мекунад, ки ин хоҷагӣ сол ба сол истеҳсоли гӯшти моҳӣ афзоиш меёбад. Дар соли 2013 Хоҷагии давлатии моҳипарварӣ беш аз 300 тонна гӯшти моҳӣ истеҳсол намудааст, ки нисбат ба соли 2012 ва нақшаи дурнамо дувуним баробар зиёд аст. Дар ҳавзҳои хоҷагӣ якчанд намуди моҳӣ парвариш меёбанд. Тавре ки корманди Хоҷагии давлатии моҳипарварии ноҳия Бобохон Назаров иброз намуд, дар айни замон беш аз 95 фисади маҳсулоти истеҳсолнамудаи хоҷагии моҳипарварӣ дар шаҳрҳои Душанбе ва Кӯлоб пешниҳоди харидорон гардонида шуда ва хоҷагидорон ҳавзҳои моҳипарвариро барои соли оянда омода месозанд.