Таҳсили кӯдакони имкониятҳояшон маҳдуд дар хона

Душанбе, 20 январ. (АМИТ «Ховар», Екатерина Пасторова).- Тавре ки муовини Вазири маорифи ва илми Тоҷикистон Раҳматулло Мирбобоев дар ҷараёни вохӯрӣ бо журналистон хабар дод, бо қарори коллегияи Вазорат «Низомнома дар бораи ташкили таълим дар хона» қабул шуд. Мавсуф қайд намуд, ки низомномаи мазкур тартиби дар хона таҳсил намудани кӯдаконеро, ки бо сабабҳои беморӣ имконияти ба мактаб рафтанро надоранд, муайян мекунад. «Ин низомнома ҳоло фақат ба кӯдаконе дахл менамояд, ки мустақилона ҳаракат карда наметавонанд», — гуфт зимни сӯҳбат бо хабарнигори АМИТ «Ховар» муовини Вазири маориф ва илми ҶТ Тоҷикистон Тоҷинисо Маҳмадова.Мувофиқи суханони номбурда, барои фароҳам овардани шароити таҳсил дар хона волидайни кӯдакони имкониятҳояшон маҳдуд бояд ба мактаби ҷойи истиқоматашон муроҷиат кунанд. «Алҳол мо низомномаро таҳия менамоем, ки мувофиқи он ҳатто кӯдаконе, ки дар беморхонаҳо муддати тӯлонӣ муолиҷа мешаванд, метавонанд таҳсилотро давом диҳанд», — зикр намуд Тоҷинисо Маҳмадова. Мувофиқи маълумоти Вазорати маориф ва илми ҶТ, бо мақсади таъмини кӯдакони имкониятҳояшон маҳдуд бо китобҳои дарсӣ бори аввал китоби дарсии «Забони ишораҳо» ба забони давлатӣ тарҷума шуд. Ғайр аз ин низомномае таҳия шудааст, ки тартиби қабулу таҳсили кӯдакони имкониятҳояшон маҳдуд бо кӯдакони солими мактабҳои таҳсилоти умумии кишварро муайян мекунад. Ба манзури таъмини муассисаҳои таълимӣ бо мутахассисони ин соҳа, дар донишгоҳҳои омӯзгорӣ ихтисосҳои сурдопедагогика, дефектология, логопедия ва психология кушода шудаанд.