Ҷаласаи Шӯрои ҳамоҳангсозии мақомоти ҳифзи ҳуқуқ

   Хоруғ, 17.02.2014. (АМИТ «Ховар», Файз Мирасан).- Дар толори мақомоти маҳаллии ҳокимияти давлатии шаҳри Хоруғ бо ибтикори  масъулини  Раёсати Агентии назорати маводи мухаддири назди Президенти ҷумҳурӣ бо намояндагони сокинони  маҳаллахои шаҳри Хоруғ  мулоқот баргузор шуд. Дар мулоқот ҳамчунин аъзои Шӯрои ҳамоҳангсозии фаъолияти мақомоти ҳифзи ҳуқуқ ширкат доштанд. Ба гуфтаи масъулини раёсати Агентии назорати маводи мухаддир танҳо соли гузашта  12 ҳодисаи  муомилоти ғайриқонунии маводи нашъаовар ошкор шуда, 55 кг 349 грамм маводи нашъадор    дарёфт ва мусодира гардид.
        Намояндагони мақомоти давлатӣ ва созмонҳои ҷамъиятӣ доир ба  мушкилоти нашъамандию нашъаҷаллобӣ ва роҳҳои коҳиш додани он фикрҳои судманд баён доштанд.  Аксарияти иштирокдорон гуфтанд, ки омодаанд барои пешгирӣ ва аз байн бурдани ин аъмоли зишт ба мақомоти қудратию амниятӣ кумак расонанд.
       Мувофиқи  маълумоти Маркази наркологии вилоят  дар 10 соли охир 212 нафар беморони нашъаманд бо сабаби аз меъёр зиёд истеъмол намудани маводи нашъадор ҷони худро аз даст доданд. Дар айни ҳол дар маркази наркологии ВМКБ 84 нафар табобатро аз тариқи доруи ҷойивазкунандаи   методон  давом медиҳанд.