Миқдори муҳоҷирони қонуншикан кам мегардад

Душанбе, 12.02.2014. (АМИТ «Ховар», Лайло Қосимова).- Ба иттилои Хадамоти муҳоҷирати Вазорати меҳнат, муҳоҷират ва шуғли аҳолии ҶТ моҳи феврали соли 2013 низоми таҳлилии Хадамоти федералии муҳоҷирати Русия зиёда аз 400 ҳазор  нафар шаҳрванди Тоҷикистонро ҳамчун вайронкунандагони қонунгузории ин давлат дар солҳои охир муайян карда, вуруди онҳоро дар муддати аз 3 то 5 сол ба ҳудуди Русия манъ кардааст.
Мутобиқи маълумоти Хадамоти федералии муҳоҷирати Русия, агар соли 2012 ҳамагӣ 351 ҳазору 940 нафар шаҳрвандони кишварамон ба  ҳуқуқвайронкунии маъмурӣ роҳ дода бошанд, соли 2013 миқдори онҳо то 324 ҳазору 574  нафар камтар гардидааст.  
Бино ба  маълумотҳои Хадамоти федералии муҳоҷирати Русия, соли 2013 ҳамагӣ 49 нафар шаҳрванди кишварамон бо қарори ин мақомот аз ҳудуди  Русия берун карда шуд, ки ин нисбат ба соли 2012 ду маротиба камтар  мебошад. Инчунин шумораи беруншудагон (бо қарори суд) низ хеле кам гардидааст. Соли 2013 ҳамагӣ 968 нафар шаҳрванди кишварамон аз ҳудуди Русия берун карда шудааст, ки ин нисбат ба соли 2012 се маротиба камтар мебошад, яъне дар он давра 3 ҳазору 303 нафар берун карда шудааст. 
Дар асоси маълумотҳои пешниҳодгардидаи мақомоти сарҳадот ва Раёсати назорати муҳоҷират дар нақлиёт ва ба ҳисобгирии муҳоҷирони Хадамоти муҳоҷират, аз гузаргоҳҳои сарҳадии Федератсияи Русия дар соли 2012 — 1659 нафар  бо сабабҳои риоя накардани қонунгузорӣ бозпас гардонида шудааст. Дар соли 2013 3215 нафар шаҳрванди кишвар аз гузаргоҳҳои сарҳадии Федератсияи Русия бозпас гардонида шудааст. 
Ба Хадамоти муҳоҷират дар ҳар се моҳ  рўйхати иловагӣ нисбат ба шаҳрвандони мазкур ворид мегардад, ки шумораи чунин нафарон  ба маротиб зиёд гардида, чунин ҳол  боиси нигаронии хадамот мебошад.